0 ဂျပန်နိုင်ငံရောက်တိုင်းရင်းသားအချင်းချင်းနွေးထွေးချစ်ခင်စွာနဲ့ ကျင်းပခဲ့တဲ့ ၆၃ နှစ်မြောက်မွန်အမျိုးသားနေ့အခမ်းအနား

တိုကျို၊ ဇန္န၀ါရီ ၃၁
သန့်မျိုးထွေး(moethaukkye)

ဂျပန်နိုင်ငံအခြေစိုက် ပုညကာရီမွန်အမျိုးသားအသင်းက ကြီးမှူးပြုလုပ်သည့် ၆၃ နှစ်မြောက်မွန်အမျိုးသားနေ့အခမ်းအနားကို ဂျပန်ရှိမြန်မာ့ဒီမိုကရေစီအရေး လှုပ်ရှားနေသည့်အဖွဲ့အစည်းများ၊ တိုင်းရင်းသားအဖွဲ့အစည်းများမှခေါင်းဆောင်များ တက်ရောက်၍ ညီညွတ်ခြင်းကိုပြသသည့်အနေနှင့် နွေထွေးပျော်ရွင်စွာ ပြုလုပ်ခဲ့ကြသည်။

အခမ်းအနားကို နှစ်ပိုင်းခွဲ၍ကျင်းပြရာ ပထမပိုင်းတွင် မွန်အမျိုးသားအလံတော်နှင့်ကျဆုံးသွားသော မွန်ခေါင်ဆောင်များကို တညီတညွတ်တည်း အလေးပြု၍ မွန်အမျိုးသားသီချင်းကိုသီဆိုပြီး စတင်ခဲ့သည်။

"လွန်ခဲ့တဲ့အတိတ်ကာလတုန်းက ကျနော်တို့ရဲ့မွန်အမျိုးသားတွေ၊ ခေါင်းဆောင်တွေဟာ မွန်တို့ရဲ့စာပေနှင့် ယဉ်ကျေးမှုကိုပြန်လည်ရရှိဖိုနဲ့ မပျောက်ပျက်အောင်ကြိုးစားအားထုတ်ခဲ့တဲ့သူတွေအားလုံးကို အသိအမှတ်ပြုဖို့ရယ်၊ ကျနော်တို့ရဲ့ ဇာတိဂုဏ်၊ အမျိုးဂုဏ်တွေကို မမေ့ဖို့ရယ်ပေါ့၊ နောက်ကျနော်တို့ရဲ့ မွန်ခေါင်းဆောင်ကြီးတွေပေးထားခဲ့တဲ့ အမျိုးသားရေးစိတ်ဓါတ်တွေကို ရှင်သန်နိုးကြားဖို့ဆိုတဲ့ ရည်ရွယ်ချက်တွေနဲ့လုပ်တာပါ"ဟု အခမ်းအနား၏ သဘာပတိလည်းဖြစ်၊ ပုညာကာရီမွန်အသင်း၏ ဥက္ကဋ္ဌလည်းဖြစ်သူ ဦးမင်းမျိုးချစ်မှပြောပြသည်။

ဂျပန်နိုင်ငံတွင်ကျင်းပသော မွန်အမျိုးသားနေ့အခမ်းအနားကို ပုညကာရီမွန်အသင်း၏ မူဝါဒပေါ်လစီများကို ချမှတ်ပေးနေသည့် ပြည်တွင်းရှိမွန်ပြည်သစ်ပါတီမှ ဥက္ကဋ္ဌနိုင်ထော်မွန်မှပေးပို့သော မွန်အမျိုးသားနေ့ သ၀ဏ်လွှာကိုဖတ်ကြားခဲ့ပြီး မွန်အမျိုးသားသွေးစည်းညီညွတ်ရေးဗဟိုကော်မတီမှလည်း သ၀ဏ်လွှာကိုပေးပို့ခဲ့ကြသည်။

မွန်အမျိုးသားနေ့ဖြစ်ပေါ်ပုံနှင့်မွန်လူမျိုးတို့၏ သမိုင်းကြောင်းကို ကိုမင်းဝင်းတေဇမှ Power Pointဖြင့်ရှင်းလင်းတက်ဆက်ပြီး ဂျပန်ရှိ နိုင်ငံရေးလုပ်ဖော်ကိုင်ဖက်အဖွဲ့အစည်းအသီးသီးနှင့် ဂျပန်အလုပ်သမားအဖွဲ့(APFS Union)မှ မစ္စတာယာမဂုချီမှ အမှာစကားပြောကြားပေးပြီး ပုညာကာရီမွန်အမျိုးသားအသင်း၏ဥက္ကဋ္ဌ ဦးမင်းမျိုးချစ်အား ဂျပန်ယဉ်ကျေးမှုထုံးစံအတိုင်း အမှတ်တရလက်ဆောင်ပေးအပ်ခဲ့သည်။

မြန်မာ့ဒီမိုကရေစီအဖွဲ့မှဦးကျော်ကျော်စိုးက "ဘယ်နိုင်ငံဘဲရောက်ရောက် သူ့စာပေနဲ့ ယဉ်ကျေးမှုဆိုတာရှိတယ်၊ ဂျပန်ရောက်လို့ ဂျပန်စာနဲ့စကားကို လေ့လာကြသလိုဘဲ မွန်တိုင်းရင်းသားတွေ အတွက် ကိုယ့်လူမျိုးရဲ့ အမျိုးသားရေးလဏ္ခာတွေမပျောက်ပျက်ဖို့ဆိုရင် မွန်စာပေနဲ့ ယဉ်ကျေးမှုကိုထိန်းသိမ်းဖို့လိုတယ်"ပြောကြားခဲ့သည်။

ပလောင်တိုင်းရင်းသားခေါင်းဆောင်ကိုမိုင်ကျော်ဦးမှ "ပလောင်လူမျိုးခွဲပေါင်း ၂၀ ကျော်ရှိတဲ့အထဲမှာ ပြောဆိုသုံးစွဲတဲ့ဘာသာစကားက မွန်ဘာသာစကားနဲ့ ၇၀ ရာခိုင်နှုန်း ကျော်နီးစပ်တယ်။ သမိုင်းအစဉ်အလာအရလဲ မွန်နဲ့ပလောင်ဟာ ယဉ်ကျေးမှုရော၊ ဘာသာစကားရောနီးစပ်မှုရှိတယ်၊ ဒီလို ၆၃ နှစ်မြောက် ကျင်းပတဲ့ မွန်အမျိုးသားနေ့အခမ်းအနားမှာ အမှာစကားပြောကြားခွင့်ရတဲ့အတွက် ၀မ်းမြောက်ဂုဏ်ပြုပါတယ်"ဟုပြောကြား၍ ပလောင်တိုင်းရင်းသားဝတ်စုံတစုံကို ဦးမင်းမျိုးချစ်အားပေးအပ်ခဲ့ပြီး မွန်အမျိုးသားဝတ်စုံတစုံကို ဦးမင်းမျိုးချစ်မှ ကိုမိုင်ကျော်ဦးအား ချစ်ခင်ရင်းနှီးစွာပြန်လည်ပေးအပ်ခဲ့ကြသည်။

၂၀၁၀ ရွေးကောက်ပွဲနှင့်ပါတ်သတ်၍ ပြည်ပရောက်မွန်တိုင်းရင်းသား ခေါင်းဆောင်တဦးအနေနှင့် ကိုယ်ပိုင်အမြင်အရ လက်ခံယုံကြည်မှုမရှိပါကြောင်း မွန်တမျိုးသားလုံးအနေနှင့် "ကျနော်တို့ရဲ့ဦးဆောင်လမ်းပြနေတဲ့ မျိုးချစ်ခေါင်းဆောင်ကြီးတွေရှိတယ်၊ သူတို့ထုတ်ပြန်ထားတာက စစ်မှန်တဲ့ဒီမိုကရေစီစနစ်နဲ့ ပြည်ထောင်စုဖြစ်လာဖို့မရှိသေးသရွေ့ကတော့ ၂၀၁၀ ရွေးကောက်ပွဲကိုလဲလက်ခံမှာမဟုတ်ဘူး၊ ၂၀၁၀မှာမလုပ်ဖြစ်လို့ ဘယ်တော့ဘဲလုပ်လုပ်လက်ခံမှာမဟုတ်ဘူး၊ ဘာဖြစ်လို့လဲဆိုတော့ မွန်တိုင်းရင်းသားတွေရဲ့အခွင့်အရေးကို ဘာမှသေချာပြဋ္ဌာန်းမထားတဲ့အတွက် ၂၀၀၈ အခြခံဥပဒေကို အခြေခံပြီးလုပ်တဲ့အတွက် ပဒေသရာဇ်စနစ်တုန်းကလို ကျနော်တို့မွန်တွေရဲ့ ဘာသာ၊ ယဉ်ကျေးမှုနဲ့လူမျိုးက တခါပြန်ပျောက်သွားဦးမှာဘဲ၊ အခြေခံဥပဒေကိုပြင်ဖို့ ကျနော်တို့တောင်းဆိုထားတဲ့အချက်တွေက ရွှေဂုံတိုင်ကြေငြာစာတမ်းနဲ့လဲထပ်တူဖြစ်နေတယ်၊ ဒီအခြေခံဥပဒေကို မပြင်မခြင်း ၂၀၁၀ ကိုကန့်ကွက်ရမှာဖြစ်တယ်"ဟု ၄င်းတို့သဘောထားကို ပြောပြသွားသည်။

အခမ်းအနားဒုတိယပိုင်းကို ဖျော်ဖြေရေးအစီအစဉ်ဖြင့်ကျင်းပခဲ့ကြပြီး မွန်ရိုးရာသီချင်း၊ အကနှင့် အငြိမ့်ဖျော်ဖြေခန်းများအပြင် တခန်းရပ်ပြဇာတ်များနှင့်ပါတက်ဆက်၍ တက်ရောက်လာသူများကို ဒန်ပေါက်ဖြင့် တည်ခင်းဧည့်ခံကျွေးမွေးခဲ့ကြသည်။

ဂျပန်နိုင်ငံတွင် မွန်အမျိုးသားနေ့အခမ်းအနားကို ၁၉၉၂ ခုနှစ်မှစတင်၍ကျင်းပခဲ့ခြင်းဖြစ်ပြီး ယခုအကြိမ်မှာ ၁၈ ကြိမ်မြောက်ဖြစ်ကြောင်းသိရပြီး တိုကျိုမြို့၊ အိုးရာမအရပ်ရှိ Green Hall တွင်ပြုလုပ်သည့်အခမ်းအနားသို့ ဂျပန်ရောက်တိုင်းရင်းသားများ၊ စိတ်ပါဝင်စားသူများနှင့် ဂျပန်လူမျိုးများအပါအ၀င် ၁၀၀ ကျော်ခန့်တက်ရောက်ခဲ့ကြကြောင်းသိရသည်။

မှတ်တမ်းဓါတ်ပုံ-မင်းညိုဝမ်း