ရာဇ၀င် စာတင်လောက်ပါတယ်
ပန်းသီး (သီးလေးသီး)
နိုဝင်ဘာ ၁၀၊ ၂၀၁၀
တနေ့သ၌ ခေတ်သစ် အလောင်းစီသူမင်းတြားကြီးသည် ( ၎င်းလက်ထက်တွင် နာဂစ်မုန်တိုင်း၊ ဂီရိမုန်တိုင်းကြောင့် ပြည်သူများသေကျေပျက်စီးပြီး အလောင်းများ စီ နေသဖြင့် ခေတ်သစ်အလောင်းစီသူ ဟု ပေးထားခြင်းဖြစ်သည်) ရွေးကောက်ပွဲပြီးတွင် ဒီမိုကရေစီနိုင်ငံသစ်ကြီးကို လှည့်လည်ကြည့်ရှုပြီ မြို့နာမည် အသစ်များပေးရန် စိတ်ကူးမိလေတော့သည်။
ထိုကြောင့် အလောင်းစီသူမင်းတြားကြီးသည် ရွေးကောက်ပွဲတွင်အနိုင်ရရှိသော “အကြပ်ကိုင် ဖွတ်ဖြိုးရေး” ပါတီအမတ်များနှင့်အတူ ဖောင်ရဟတ်ယာဉ်ဖြင့် မြို့နာမည်အသစ်များပေးရန် တိုင်းပြည်အတွင်းသို့ လှည့်လေသည်။
မင်တြားကြိး ။ ။ မောင်မင်း … အောက်မှာ လူတွေတိုးဝှေ့နေကြပါလား။ ဆီတွေ ဝေနေတာလား၊ ဆန်တွေ ဝေနေတာလား မောင်မင်းရဲ့။
ဝန်ကြီး ။ ။ မဟုတ်ပါဘူး ဘုရား။ ဘတ်စ်ကားစီးဖို့ တိုးနေကြတာပါ။
မင်းတြား ။ ။ အဲဒါ ဘာမြိုလဲဟဲ့..ဒီမှာကော မဲနိုင်လားဟဲ့။
ဝန်ကြီး ။ ။ ရန်ကုန်လို့ ခေါ်ပါတယ်ဘုရား။ နိုင်တော့ နိုင်တယ် မဲတွေလဲ ဘုံးရပါတယ်ဘုရား။
မင်းတြား ။ ။ မဲတွေ ဘုံးရတယ်ဆိုတော့ ဒီမိုကရေစီနိုင်ငံသစ်ကြီးမှာ ရန်ကုန်မြို့နာမည်ပြောင်း၊ မဲဘုံးမြို့လို့ ခေါ်စေဗျား....။
ဝန်ကြီး ။ ။ သင့်မြတ်ကြောင်းပါ ဘုရား၊ ရွှေဘောတော်အတိုင်းပါ ဘုရား။
မင်းတြား ။ ။ မောင်မင်း … အောက်မှာ ဗျောက်အိုးသံတွေ ဆူညံလှချီလား။ အဲဒါဘာမြို့လဲကွဲ့။
ဝန်ကြီး ။ ။ ဗျောက်သံမဟုတ်ပါဘူး ဘုရား။ မြို့သူမြို့သားတွေနဲ့ ရန်ဖြစ်ရင် လက်ဦးမှုရအောင် စစ်တပ်က စစ်သားတွေ သေနတ်ပစ် လေ့ကျင့်နေတာပါ။ ပဲခူးမြို့လို့ ခေါ်ပါတယ် ဘုရား။ ဒီမြို့မှာလဲ မဲခိုး လို့ နိုင်တာပါဘုရား။
မင်းတြား ။ ။ မဲခိုးလို့ နိုင်တဲ့အတွက် ပဲခူးမြို့ နာမည်ပြောင်း၊ မဲခိုးမြို့လို့ ခေါ်တွင်စေဗျား။
ဝန်ကြီး ။ ။ သင့်မြတ်ကြောင်းပါ ဘုရား၊ ရွှေဘောတော်အတိုင်းပါ ဘုရား။
မင်းတြား ။ ။ မောင်မင်း … အောက်မှာ အသားဖြူဖြူနဲ့လူတွေ အများကြီးပါလား။ ငါ့ဖောင်ရဟတ်ယာဉ်တော်က တရုတ်ပြည်ရောက်နေတာလားကွဲ့။
ဝန်ကြီး ။ ။ တရုတ်ပြည် မဟုတ်ပါဘူးဘုရား။ အဲဒါ မန္တလေးပါဘုရား။ ဒီမြို့ကျတော့ မဲမသမာလို့ နိုင်တာပါ။
မင်းတြား ။ ။ အော် … မဲမသမာဘဲ နိုင်တဲ့အတွက် မန္တလေးမြို့အစား ... မဲမသမာမြိ့လို့ ခေါ်တွင်စေဗျား။
ဝန်ကြီး ။ ။ သင့်မြတ်ကြောင်းပါ ဘုရား၊ ရွှေဘောတော်အတိုင်းပါ ဘုရား။
မင်းတြား ။ ။ ဒါနဲ့ မန္တလေးဘေးနားကမြို့က ဘာမြို့လဲကွဲ့ မောင်မင်း။
ဝန်ကြီး ။ ။ မှန်ပါ စစ်ကိုင်းမြို့ပါ ဘုရား။ စစ်ကိုင်းမြို့မှာတော့ မဲတွေညစ်လို့ နိုင်တာပါဘုရား။
မင်းတြား ။ ။ စစ်ကိုင်းမြို့လဲ နာမည်ပြောင်း … မဲညစ်မြို့လို့ ခေါ်တွင်စေဗျား။
ဝန်ကြီး ။ ။ သင့်မြတ်ကြောင်းပါ ဘုရား၊ ရွှေဘောတော်အတိုင်းပါ ဘုရား။
မင်းတြား။ ။ ပင်လယ်ပြင်ကြီးနဲ့ပါလား … အဲဒါဘာမြို့လဲဟဲ့။
ဝန်ကြီး ။ ။ ပုသိမ်မြို့ပါဘုရား။ ဒီမြို့မှာလဲ မဲတွေလိမ်လို့ နိုင်တာပါဘုရား။
မင်းတြား ။ ။ မဲလိမ်တဲ့အတွက် ပုသိမ်မြို့အစား မဲလိမ်မြို့လို့ ပြောင်းစေဗျား။
ဝန်ကြီး ။ ။ သင့်မြတ်ကြောင်းပါ ဘုရား၊ ရွှေဘောတော်အတိုင်းပါ ဘုရား။
မင်းတြား ။ ။ တနိုင်ငံလုံး မြို့နာမည်တွေကို မောင်မင်းတို့ပဲ ပြီးမှ ထပ်ပြောင်းပေးလိုက်ပေတော့။ ငါမှာ့ ကျန်းမာရေးကလည်း မကောင်းဘူး။ နေပြည်တော်ပြန်ဖို့ ဖောင်ရဟတ်ယာဉ် ပြန်လှဲ့မယ်ဟေ့။ ဒါနဲ့ မြို့တွေကိုတော့. မဲလိမ်၊ မဲခိုး၊ မဲမသမာ၊ မဲညစ် ဆိုပြီး နာမည်တွေ ပြောင်းပြီးပြီ။ ငါ့တိုင်းပြည်နာမည်လဲ ပြောင်းရအုံးမယ်လေ။ ဘယ်လိုပြောင်းမလဲ ဟဲ့။
ဝန်ကြီးများ။ ။ မှန်ပါ “ဗြောင်လိမ်ဗြောင်စား မုသာဝါဒတိုင်းပြည်” လို့သာ ပြောင်းလိုက်ပါတော့ ဘုရား …။
မင်းတြား ။ ။ အိမ်း … အိမ်း … ကောင်းလိုက်တဲ့ အကြံပဲ။ ငါကိုယ်တော်မြတ်ကြီး ရွှေဘောတော် ကျတော်မူတယ်။ မောင်မင်းတို့နောက်တော်ပါးက ထမ်းပြီးသာ လိုက်ခဲ့ကြပေတော့။ (သွပ်သွပ်သွပ်)
0 comments:
Post a Comment
လာရောက်လည်ပတ်ကြသော မိတ်ဆွေတို့ရဲ့အမြင်များလည်း ရေးနိုင်ပါတယ်