အင်တာနက်သတင်းစာမျက်နှာတွေမှာ ပါရှိနေတဲ့ စစ်အစိုးရနဲ့ `၀´တပ်ဖွဲ့တွေကြားမှာ စစ်ရေးပြင်ဆင်မှုတွေ ပြုလုပ်နေကြပြီဆိုတဲ့သတင်းကို အတည်ပြုနိုင်ဖို့အတွက် နယ်စပ်မှာရှိတဲ့ သတင်းသမားတွေကတစ်ဆင့် စုံစမ်းခဲ့ပါ တယ်။ စီးပွားရေးသမား ကုန်သည်တွေရဲ့ပြောပြချက်အရကတော့ `` ဒီမှာကတော့ စစ်တိုက်ဖို့အတွက် ကြီးကြီးမားမား ပြင်ဆင်နေတာတွေ မတွေ့ရပါဘူး။ ပုံမှန် စစ်ကားတွေ၊ စစ်သားတွေ သွားတာ လာတာလောက်တော့ ရှိတာပေါ့။ စစ်အစိုးရတပ်နဲ့ `၀´ တပ်တွေ တိုက်ကြခိုက်ကြတော့မယ်ဆိုတာကိုတော့ မကြားမိပါဘူး။ စစ်ပွဲတွေဖြစ်လာဖို့ကတော့ သိပ်မဖြစ်နိုင်ပါဘူး။ ဘာဖြစ်လို့လဲဆိုတော့ `၀´ဒေသက တရုတ်နဲ့နီးတယ်လေ။ တရုတ်က `၀´ နယ်စပ်မှာ ကိုးကန့် ဒေသမှာဖြစ်ခဲ့သလိုမျိုး ထပ်အဖြစ်ခံမယ် မထင်တော့ဘူး။ ကိုးကန့်မှာသူတို့အများကြီး ဆုံးရှုံးခဲ့တာကို။ `၀´ တပ်ဖွဲ့တွေကို အစိုးရနဲ့ ညှိညှိနှိုင်းနှိုင်းလုပ်ဖို့ တရုတ်က ဖိအားပေးမှာပဲလေ။ စစ်အစိုးရကိုလည်း ထိန်းထိန်းသိမ်းသိမ်းလုပ်ဖို့ တရုတ် ကပြောမှာပဲ။ ဘာလို့လဲဆိုတော့ သူ့ရဲ့အကျိုးစီးပွားကို မထိခိုက်အောင်တော့ တရုတ်က လုပ်မှာပဲလေ´´ ဒါကတော့ နယ်စပ်က ကုန်သည်ကြီးတစ်ဦးရဲ့ ပြောကြားချက်ပါ။
တရုတ်နယ်စပ်က မြန်မာ့စစ်ရေးလေ့လာနေသူတစ်ဦးကို စစ်အစိုးရနဲ့ `၀´ တပ်ဖွဲ့တွေရဲ့အခြေအနေနဲ့ပတ်သက်ပြီး ထင်မြင်ချက်ကို တောင်းခံခဲ့ရာမှာ ``အခုလောလောဆယ်အနေနဲ့ကတော့ စစ်အစိုးရနဲ့ `၀´တပ်ဖွဲ့တွေကြားမှာ တိုက်ပွဲတွေဖြစ်လာနိုင်စရာ မရှိပါဘူး။ စစ်အစိုးရဘက်ကိုကြည့်မယ်ဆိုရင် ဒီ... ၂၀၁၀ ရွေးကောက်ပွဲအတွက် လိုအပ်တဲ့ ဥပဒေတွေထုတ်ပြန်နိုင်ဖို့ လုံးပန်းနေရတာလေ။ နိုင်ငံတကာက ဖိအားပေးမှုတွေလဲ ရှိနေတာကိုး။ ဒီလိုအချိန်မျိုး မှာ ပြည်တွင်းမှာ ရွေးကောက်ပွဲ၊ နယ်စပ်မှာ တိုက်ပွဲဆိုတဲ့ ဘေးကြပ်နံကြပ်ပုံစံမျိုး နအဖက အဖြစ်ခံမှာ မဟုတ်ဘူးလေ။ `၀´တပ်ဖွဲ့ဘက်က ကြည့်ရင်လဲ ဘာပဲပြောပြော ငြိမ်းချမ်းရေး ယူထားတယ်ဆိုပြီး အေးအေးဆေးဆေးနေလာရတာ ကြပြီလေ။ ခေါင်းဆောင်ပိုင်းမှာကလဲ တရားဝင်ပဲဖြစ်ဖြစ်၊ တရားမ၀င်ပဲဖြစ်ဖြစ် စီးပွားရေးတစ်ချို့က အခြေကျနေပြီလေ။ အောက်ခြေမှာကလဲ ဆင်းဆင်းရဲရဲနဲ့ စစ်မတိုက်ရဘဲ သက်တောင့်သက်သာနေလာရတာကြာပြီဆိုတော့ စစ်ပြန်တိုက်ဖို့ ဆန္ဒသိပ်ရှိကြတော့မယ်မထင်ဘူး။ နောက်ပြီးတော့ `၀´ဒေသက သာမန်အနေနဲ့ဆို အစားအသောက်ရှားပါးတယ်လေ။ အခုမှ စစ်ပွဲတွေ မရှိတာကြာလို့ တရုတ်နဲ့ ကုန်သွယ်ရေးလုပ်၊ ဗမာပြည်တွင်းနဲ့ ကုန်သွယ်ရေးတွေ လုပ်နေလို့ အဆင်ပြေလာကြတာ။ တရုတ်ကလဲ `၀´ကို စစ်မတိုက်ဖို့ ဖိအားပေးနိုင်တယ်။ ကိုးကန့်လို ဆုံးရှုံးမှုမျိုး တရုတ်က နောက်ထပ်လိုချင်မယ် မထင်ဘူး ´´ ဆိုပြီး သူ့ရဲ့အမြင်ကို ပြောကြားသွားခဲ့ပါတယ်။
မိုင်းလားမှာရှိတဲ့ `၀´တပ်ဖွဲ့နဲ့နီးစပ်တဲ့ အသိုင်းအ၀ိုင်းကို တီးခေါက်ကြည့်တော့ `` အစိုးရတပ်နဲ့ `၀´ တပ်ဖွဲ့တွေ စစ်တိုက်ဖို့ ပြင်ဆင်မှုတွေလုပ်နေတယ်။ တိုက်ကြတော့မယ်ဆိုတာကတော့ ဖြစ်နိုင်ချေအရမ်းနည်းပါတယ်။ ဒီလို ပေါ်တင်ကြီးတိုက်မယ့်အစား ကိုးကန့်မှာလုပ်ခဲ့သလိုမျိုး သွေးခွဲနည်း၊ အကြပ်ကိုင်နည်းပေါ့ဗျာ။ `၀´ ထိပ်ပိုင်းခေါင်းဆောင်တွေရဲ့ တရားမ၀င်လုပ်ငန်းတွေ ဥပမာ.... လက်နက်၊ မူးယစ်ဆေးဝါးပေါ့ဗျာ။ အဲ့ဒါမျိုးတွေကို ကိုင်ပြီး `၀´တွေ သဘောထားပျော့ပြောင်းလာဖို့ စည်းရုံးတဲ့နည်း၊ အကြပ်ကိုင်တဲ့နည်းကို သုံးဖို့ ပိုများပါတယ်။ စစ်အစိုးရနဲ့ `၀´ တိုက်ကြတော့မယ်ဆိုပြီး သတင်းထွက်လာရတဲ့ ဖြစ်နိုင်ချေကတော့ ရွက်ဆစ်ရဲ့ ရှမ်းပြည်တပ်မတော်ဘက်က သတင်းလွှင့်တာ ဖြစ်နိုင်တယ်ဗျ။ ဘာဖြစ်လို့လဲဆိုတော့ အခု ပွင့်လင်းရာသီရောက်လာပြီလေ။ အဲ့ဒီတော့ အစိုးရ တပ်တွေက လွယ်တိုင်းလျဲန်း ဌာနချုပ်ကို ထိုးစစ်တွေ လုပ်လာနိုင်တယ်။ အဲ့ဒီတော့ သူတို့ဘက် မလှည့်နိုင်အောင် အစိုးရနဲ့ `၀´ကို ရန်တိုက်ပေးနေပုံပါပဲ။ နောက်ပြီး ထိုင်းဘက်ကလဲ ဖြစ်နိုင်တယ်။ ထိုင်းက `၀´ကို မူးယစ်ဆေးဝါးနဲ့ ပတ်သတ်ပြီး နှိမ်နင်းချင်နေတာကြာပြီ။ အခွင့်အရေးမရသေးလို့သာ ကြည့်နေတဲ့သဘောရှိတယ်။ အခု စစ်အစိုးရနဲ့ `၀´တပ်ဖွဲ့တွေ တိုက်ပွဲသာတကယ်ဖြစ်ရင် ထိုင်းက ဘယ်လိုပဲကြည့်ကြည့် အမြတ်ထွက်မှာပဲလေ။ ထိုင်းက မြန်မာ အစိုးရဘက်ကို မသိမသာသွေးထိုးပေးနေပုံပါပဲ။ လောလောဆယ်မှာတော့ မိုင်းလား၊ မိုင်းမော၊ ပန်ဆိုင်း၊ ဟိုပန် ဘက်တွေမှာ အေးအေးဆေးဆေးပါပဲ´´ ဟု သူ့ရဲ့ ယူဆချက်များကို ဆွေးနွေးသွားခဲ့ပါတယ်။
ကချင်နေ့စဉ်သတင်း
1 year ago
0 comments:
Post a Comment
လာရောက်လည်ပတ်ကြသော မိတ်ဆွေတို့ရဲ့အမြင်များလည်း ရေးနိုင်ပါတယ်