အားလုံးစိုးရိမ်နေကြတဲ့ ဖူကူရှီးမား နြူကလိယား ဓါတ်အားပေးစက်ရုံက အခြေအနေတွေက အတော်လေး ထိမ်းချုပ်နိုင်တဲ့ အခြေအနေကို ရောက်နေပြီလို့ ယူဆရတာပါဘဲ.. ကြာသပတေးနေ့ကတည်းက စီစဉ်ပြီး သောကြာနေ့မှာ အပြင်းအထန် ရေဖျန်းကြတဲ့အတွက် အခုဆိုရင် လေထုထဲမှာ ပြန့်နှံ့နေတဲ့ ရေဒီရေးရှင်း လယ်ဗယ်က တဖြည်းဖြည်း ကျဆင်းလာနေပါပြီ.. ဂျပန် တပ်မတော်က ရဟတ်ယာဉ်နှစ်စီးဟာ ပင်လယ်ထဲကရေတွေကို ခပ်ယူပြီး သက်စွန့်ဆံဖျား ဓါတ်အားပေးစက်ရုံရဲ့ အပေါ်ကနေ ရေတွေဖျန်းချနေတာ ရုပ်မြင်သံကြားသတင်းတွေကတစ်ဆင့် အားလုံးသိပြီးဖြစ်ကြမယ် ထင်ပါတယ်ခင်ဗျာ..
ှုဂျပန်တပ်မတော်ပိုင် ရဟတ်ယာဉ်နှစ်စီးအပါအဝင် မြေပြင်က ရဲတပ်ဖွဲ့နဲ့ မီးသတ်တပ်ဖွဲ့က မီးသတ်ကား တွေကလည်း ဓါတ်အားပေးစက်ရုံအနီးကို စနစ်တကျ ချဉ်းကပ်ပြီး ရေဖြန်းနေပါသေးတယ်.. တစ်ချိန်တည်းမှာဘဲ စက်ရုံပိုင်ရှင်ဖြစ်တဲ့ တိုကျိုလျှပ်စစ် ကုမ္ပဏီကလည်း ပျက်စီးနေတဲ့ စက်ရုံရဲ့ ဓါတ်အားပေးစနစ်ကို အစားထိုးနိုင်ဖို့ တခြားနေရာက ဓါတ်အားကို အသုံးပြုနိုင်မယ့် ဓါတ်အားလိုင်းသွယ်တန်းနေတာ အတော်လေးခရီးရောက်နေပြီလို့ ဆိုပါတယ်.. အဲဒီဓါတ်အားကို အသုံးပြုပြီး ပျက်စီးသွားတဲ့ ဓါတ်ပေါင်းဖို အအေးပေးစနစ်ကို ပြန်လည် အသက်သွင်းဖို့ ကြိုးစားကြမယ်တဲ့.. ၁၉ ရက်နေ့ညပိုင်းမှာ ပြင်ပကနေ လျှပ်စစ်ဓာတ်အားကြိုးလိုင်းကို ဖူကူရှီးမားအမှတ် ၁ ၊အမှတ်(၂) ဓာတ်အားပေးစက်ရုံ နားအထိ သွယ်တန်းလို့ပြီးပြီလို့ TEPCO က ပြောပါတယ်။
ဒီနေ့နဲ့ မနေ့က တော့ ဂျပန်နိုင်ငံတစ်ဝှမ်း မြို့ကြီးအတော်များများက မီးသတ်တပ်ဖွဲ့အင်အားတွေကို ဖူကူရှီးမားဆီ အာင်အားဖြည့်တင်းဖို့ အသီးသီးစေလွှတ်လိုက်ပါပြီ.. မီးသတ်တပ်ဖွဲ့ဝင်တွေ အသုံးပြုတဲ့ မီးသတ်ကားတွေအနက်..တစ်မိနစ်မှာ ရေတန်ချိန် ၃.၈ တန်ကို ၂၂ မီတာအမြင့်ကနေပြီး အဝေးထိန်းစနစ်နဲ့ ပက်ဖြန်းနိုင်တဲ့ မီးသတ်ကား တွေ.. မီးသတ်ပိုက်ပေါက်ပေါင်း ၇၂ ပေါက်ပါဝင်ပြီး ၂ ကီလိုမီတာအကွာအဝေးက ပင်လယ်.. ဒါမှမဟုတ် မြစ်တစ်ခုအတွင်းက ရေကို စုပ်ယူပြီး မီးသတ်ကားတွေဆီကို ရေအဆက်မပြတ်ပေးပို့နိုင်တဲ့ super pumper လို့ခေါ်တဲ့ အထူးရေသယ် ထရပ်ကားတွေလည်းပါဝင်ပါသတဲ့.. ဒါပေမယ့် ဒီလို ရေဖြန်းပြီးဖြေရှင်းဖို့ ဖြစ်လာရတာကတော့ အထူးသဖြင့် အမေရိကန်က အပြင်းအထန်ဖိအားပေးပြီး သူ့ရဲ့ ရေတပ်အခြေစိုက်စခန်းက ရဟတ်ယာဉ်တွေ ပို့မယ်တကဲကဲလုပ်နေလို့ ဒီအစီအစဉ်ပေါ်လာရတယ်လို့လည်း သတင်းတစ်ချို့က ဆိုပါတယ်..
ရေပက်ဖျန်းပြီး ဓါတ်ပေါင်းဖိုတွေရဲ့ အပူချိန်ကို လျှော့ချနိုင်တဲ့ တစ်ချိန်ထည်းမှာဘဲ လေထုအတွင်း ပြန့်နှံ့နေတဲ့ ရေဒီရေးရှင်း လယ်ဗယ်ကျဆင်းလာတာကို အတည်ပြုနိုင်ခဲ့တာပါ... ဒီလို ရေပက်ဖြန်းတာရဲ့ အကျိုးသက်ရောက်မှု အတိုင်းအတာ ဘယ်လောက်အထိ ရှိမယ်ဆိုတာ မသေချာ မရေရာသေးပေမယ့်.. မနေ့ကရော ဒီနေ့ပါ အင်အားအပြည့်သုံးပြီး လုပ်ဆောင်နေတဲ့ အကျိုးသက်ရောက်မှုကတော့ မကြာခင်သိနိုင်မယ်လို့ထင်ပါတယ်.. သေချာတာတစ်ခုကတော့ လတ်တလောမှာ အားလုံးစိတ်ပူနေကြပေမယ့် ပတ်ဝန်းကျင်က လူသားတွေကို အကြီးအကျယ် ထိခိုက်စေမယ့် အန္တရာယ်ကို အတိုင်းအတာတစ်ခုအထိ ဟန့်တားနိုင်ခဲ့ပြီဆိုတာကတော့ သေချာပါတယ်...
တစ်ချိန်ထည်းမှာဘဲ အမေရိကန်ပြည်ထောင်စုက တပ်ဖွဲ့ဝင် ၄၅၀ ပါဝင်တဲ့ နြူကလီယား စွမ်းအင်သုံး အကြမ်းဖက်မှု တန်ပြန်တိုက်ဖျက်ရေးအဖွဲ့ကို ဂျပန်နိုင်ငံဆီကို စေလွှတ်ဖို့ အသင့်ပြင်ထားပါတယ်.. ဒါပေမယ့်.. အမေရိကန် ပြည်ထောင်စုရဲ့ နည်းပညာဆိုင်ရာ အကူအညီပေးရန် ကမ်းလှမ်းမှုကို ဂျပန်အစိုးရနဲ့ တိုကျိုလျှပ်စစ် ဓါတ်အား ပေးရေး ကုမ္ပဏီတို့က ငြင်းဆန်ထားပါတယ်.. ဒီလိုငြင်းပယ်မှုအတွက် ပြည်တွင်းမှာ ဆန့်ကျင်ဝေဖန်သူတွေ ရှိနေပေမယ့် အစိုးရနဲ့ တိုကျိုလျှပ်စစ်တို့ဟာ အခုပြဿနာကို ကိုယ့်နည်းကိုယ့်ဟန်နဲ့ ပိုင်ပိုင်နိုင်နိုင် ဖြေရှင်းနိုင်မယ် လို့ ယုံကြည်နေပုံရပါတယ်..
တစ်ချိန်ထည်းမှာဘဲ ကမ္ဘာမှာ နြူကလိယ စွမ်းအင်သုံး ဓါတ်အားထုတ်နိုင်ငံတွေထဲက ထိပ်တန်းနိုင်ငံတစ်ခုဖြစ်တဲ့ ပြင်သစ်နိုင်ငံကတော့ ရေဒီရေးရှင်း ယိုစိမ့်မှုကို ထိန်းရာမှာသုံးတဲ့ ဘိုရစ်အက်ဆစ် တန်ချိန်၁၀ဝ အဏုမြူ အကာအကွယ်ဝတ်စုံတွေ လက်အိပ်တွေနဲ့ မျက်နှာဖုံးတွေကို ပေးပို့ခဲ့ပါတယ်.. တစ်ချိန်ထည်းမှာဘဲ ဂျပန်မှာရှိနေတဲ့ သူ့နိုင်ငံသား ၂၀ဝ ကျော်ကို သယ်ထုတ်သွားခဲ့ပါတယ်.. ဒါ့အပြင် သူ့နိုင်ငံမှာ လောလောဆယ် ဂျပန်ကို ခရီး မသွားကြဖို့ အပြင်းအထန် တားမြစ်ထားပါတယ်တဲ့..
ယခု ၂၀၁၁ ခုနှစ် တိုဟိုကု ပစိဖိတ်ငလျင်ကြီးကြောင့် သေဆုံးရသူဦးရေဟာ ၁၉၉၅ ခုနှစ်က ကမ္ဘာမှာ ကိုဘေးငလျင်လို့ လူသိများတဲ့ (ဟန်ရှင်းငလျင်ကြီး) ကြောင့် သေဆုံးရသူဦးရေ ၆၄၃၄ ဦးထက် ကျော်လွန်သွားပြီဖြစ်ပါတယ်.. ယခုအခါမှာ တပ်မတော်သားတွေ ရဲတပ်ဖွဲ့ဝင်တွေပါ အပါအဝင်ဖြစ်တဲ့ ကယ်ဆယ်ရေးလုပ်သားပေါင်း ၉၀ဝ၀ဝ နဲ့ ကယ်ဆယ်ရေးလုပ်ငန်းတွေ လုပ်ဆောင်နေရာမှာ စုစုပေါင်း လူဦးရေ ၂၆၀ဝ၀ ကို အသက်ဘေးကနေ ကယ်ဆယ်နိုင်ခဲ့တယ်လို့ မှတ်တမ်းတွေက ဖော်ပြနေပါတယ်.. တစ်ချိန်ထည်းမှာဘဲ ပျက်စီးသွားတဲ့ ရထားလမ်းတွေ အဝေးပြေးလမ်းမကြီးတွေကိုလည်း အပူတပြင်းပြင်ဆင်နေခဲ့တာ အခုအချိန်မှာ အကြမ်းဖျဉ်း ပြင်ဆင်လို့ပြီးသွားတဲ့အတွက် ငလျင်ဒဏ်ခံဒေသမှာ အဓိကလမ်းမကြီးဖြစ်တဲ့ တိုဟိုကု အဝေးပြေးလမ်းမကြီးကို အရေးပေါ်ယာဉ်တွေအတွက် ဖွင့်လှစ်ပေးထားပြီဖြစ်ပါတယ်.. ဒါ့အပြင် ငလျင်ဒဏ်ကြောင့် ပျက်စီးသွားခဲ့ရတဲ့ ]စန်းဒိုင်} လေယာဉ်ကွင်းကိုလည်း အကူအညီပေးရေး လေယာဉ်နဲ့ ရဟတ်ယာဉ်တွေ ဆင်းသက်နိုင်ဖို့ ပြင်ဆင်ပေးပြီးသွားပါပြီ..
ငလျင်ဘေးဒဏ်နဲ့ ဆူနာမီဒဏ်ကို ခံစားခဲ့ကြရတဲ့ ဂျပန်ပြည်သူများအနက် တစ်ချို့ဒေသတွေမှာ အတော်လေး ဒုက္ခရောက်ကြရရှာပါတယ်.. ဒီရက်ပိုင်းအတွင်း အပူချိန်က ရုတ်တရက်ကျဆင်းသွားပြီး အအေးဓါတ် လွန်ကဲခဲ့တာကြောင့် ဒုက္ခသည်ခိုလှုံရေးစခန်းတွေက ဒုက္ခသည်တွေ အတော်လေးခံစားကြရပါတယ်တဲ့.. ဒီကြားထဲမှာ အဆိုးဆုံးကလောင်စာဆီအခက်အခဲကြောင့် ဒုက္ခသည်စခန်းတွေမှာ ယာယီအနွေးပေးစံနစ်တစ်ချို့ ရပ်ဆိုင်းထားခဲ့ရတာပါဘဲ.. ဒါ့အပြင် လောင်စာဆီအခက်အခဲနဲ့ ရေဒီရေးရှင်းအန္တရာယ်ကြောင့် ဘေးဒုက္ခခံစားရတဲ့ ဒေသတွေဆီကို အစားအသောက်နဲ့ တခြားထောက်ပံ့ရေးအကူအညီပေးပို့ရေးတွေဟာလည်း အခက်အခဲနဲ့ ရင်ဆိုင်ခဲ့ရပါသတဲ့.. ဒါ့အပြင် ငလျင်ဒဏ်ခံဒေသတစ်ချို့က ဆေးရုံတွေမှာ အခက်အခဲများစွာရှိနေတယ်ဆိုတဲ့ သတင်းတွေလည်း ထွက်ပေါ်နေပါတယ်.. ဆေးရုံတစ်ချို့မှာ တက်ရောက်ကုသနေတဲ့ သက်ကြီးရွယ်အို လူမမာတွေခမြာ ကြမ်းပြင်ပေါ်မှာ အစီအရီလဲလျောင်းကာ မစို့မပို့ ဆေးဝါး အာဟာရနဲ့ အသက်ဆက်ပြီး အကူအညီတွေကို စောင့်မျှော်နေရတဲ့ အခြေအနေတွေလည်း ရှိနေသေးတယ်လို့ဆိုပါတယ်... ဖူကူရှီးမားဒေသက ဆေးရုံတစ်ချို့မှာတော့ လျှပ်စစ်ဓါတ်အား၊ ဆေးဝါးနဲ့ ကျန်းမာရေးဝန်ထမ်း ချို့တဲ့အားနည်းမှုကြောင့် ဖြစ်ပွားရတဲ့ အသေအပျောက်တွေတောင်ရှိနေတယ်လို့ကြားသိရပါတယ်..
လာမယ့် တနင်္လာနေ့မနက်ဟာ ဂျပန်နိုင်ငံရဲ့ နွေဦးရာသီအထိမ်းအမှတ် ရုံးပိတ်ရက်ဖြစ်တာမို့ ဒီနေ့ စနေနေ့မနက်မှာ ဂျပန်နိုင်ငံတစ်ဝှမ်းက အစိုးရမဟုတ်တဲ့ အဖွဲ့အစည်းတွေဦးဆောင်တဲ့ ဗော်လန်တီယာစင်တာတွေက ဗော်လံတီယာတွေရဲ့ အကူအညီ ပေးရေး အစီအစဉ်ကြီး ဒီရက်ပိုင်း ရုံးပိတ်ရက် သုံးရက်မှာ စတင်နေပါပြီ.. တစ်ချို့နေရာတွေမှာ အပျက်အစီးတွေကို ရှင်းလင်းဆဲ တစ်ချို့နေရာတွေမှာတော့ အဆောက်အဦတွေကို ပြန်လည်ပြီး စတင်ဆောက်လုပ်နေပါပြီ..
ပြီးခဲ့တဲ့ အင်္ဂါနေ့က စတင်ပေါ်ပေါက်ခဲ့တဲ့ ဘဏ်ရဲ့ ကွန်ပြူတာစနစ် ချို့ယွင်းမှုကြောင့် ပြီးခဲ့တဲ့ သောကြာနေ့အထိ ဂျပန်ရဲ့ထိပ်တန်းပုဂ္ဂလိက ဘဏ်ကြီး မီဇူဟိုရဲ့ အေတီအမ်စက်တွေမှာ ငွေထုတ်မရတဲ့ ပြဿနာပေါ်ခဲ့ပါတယ်၊ လေးရက်တာအတွင်း ဘဏ်မှာ စာရင်းဖွင့်ထားတဲ့ လစာပေးစာရင်းပေါင်း ၆၂၀ဝ၀ဝ မှာ ငွေထုတ်မရနိုင်တဲ့ ပြဿနာတက်ခဲ့တာမို့ လေးရက်တာအတွင်း ငွေလည်ပတ်မှုပမာဏစုစုပေါင်း ယန်းငွေ ၇၇၅ ဘီလျံခန့် မလည်ပတ်နိုင်ဘဲ ပိတ်ဆို့နေခဲ့ပါသတဲ့.. ဒါပေမယ့် ယခုကျရောက်တဲ့ ပိတ်ရက် သုံးရက်အတွင်း အဲဒီကွန်ပြူတာ စနစ်ချို့ယွင်းမှုကို ဖြေရှင်းနိုင်လိမ့်မယ်လို့ ယုံကြည်ရပြီး ရုံးဖွင့်ရက်ဖြစ်တဲ့ အင်္ဂါနေ့မှာတော့ အဆင်ပြေနိုင်မယ်လို့ မျှော်လင့်ရပါတယ်.. အဲဒီကိစ္စအတွက် မီဇူဟိုဘဏ်ဥက္ကဌ ဆာတိုရု နီရှီဘိုလိ ကိုယ်တိုင် မနေ့က သတင်းစာရှင်းလင်းပွဲလုပ်ပြီး အများပြည်သူကို ဦးညွှတ်ဝန်ချတောင်းပန်တာ တီဗီကနေတစ်ဆင့် မြင်တွေ့လိုက်ရပါတယ်.. ဘဏ်အနေနဲ့ လာမယ့် အင်္ဂါနေ့အထိမှ အဲဒီကွန်ပြူတာ ချို့ယွင်းချက်ကို ပြင်ဆင်နိုင်ခဲ့ခြင်းမရှိရင် ဘဏ်စာရင်းပိုင်ရှင်တွေကို တစ်ဦးလျှင် ယန်းတစ်သိန်းအထိ လျော်ကြေးပေးဖို့လည်း စဉ်းစားနေတယ်လို့ ဆိုပါတယ်.. ကောင်းလိုက်လေခြင်းဗျာ.. တစ်ပတ်လောက် ငွေထုတ်မပေးနိုင်တာနဲ့လျော်ကြေးရမယ်ဆိုလို့ပါ..
ဒီရက်ပိုင်း တဟုန်ထိုးကျဆင်းနေတဲ့ ဂျပန်စတော့ရှယ်ယာဈေးကွက်ရဲ့ အညွှန်းကိန်းတွေဟာလည်း သောကြာနေ့မှာ ပြန်လည်ဦးမော့လာပါတယ်..ဒီလိုကြီးမားတဲ့ သဘာဝဘေးအန္တရာယ်ကြီးနဲ့ ရင်ဆိုင်ခဲ့ရပေမယ် ဂျပန်နိုင်ငံတွင်းကရော ပြည်ပကပါ့  ဂျပန်ရဲ့စီးပွားရေးဟာ ခိုင်မာဆဲဘဲလို့ ငလျင်ဘေးကြီးဖြစ်ပြီးစကတည်းက စီးပွားရေးအသိုင်းအဝိုင်းကရော ပညာရှင်အားလုံးကပါ ယုံကြည်ထားကြတာပါ.. တစ်ကယ်လည်းဘဲ အခုလို ကသောင်းကနင်း အခြေအနေတွေ ကုန်လွန်သွားတာနဲ့ တစ်ပြိုင်နက် ပြန်လည်တည်ဆောက်ရေး လုပ်ငန်းတွေအတွက် ပြည်တွင်းဈေးကွက်ကြီးရဲ့ ဝယ်လိုအား က ကြောက်ခမန်းလိလိဖြစ်လာဖို့အလားအလာအများကြီးရှိပါတယ်ခင်ဗျား..
MMCPမှ koshwemung အားကျေးဇူးတင်ရှိပါသည်...
0 comments:
Post a Comment
လာရောက်လည်ပတ်ကြသော မိတ်ဆွေတို့ရဲ့အမြင်များလည်း ရေးနိုင်ပါတယ်