သမီးလေး ရယ်နိုင်ပြီ
နာရေးကူညီမှုအသင်း(ရန်ကုန်)ရှိ သုခကုသိုလ်ဖြစ်ဆေးခန်းတွင် လူမျိုးဘာသာ၊ ဆင်းရဲချမ်း သာမရွေးတို့၏ ရောဂါဝေဒနာများကို အခမဲ့ ကုသပေးလျှက်ရှိရာ နေ့စဉ် လူနာစုစုပေါင်း (၂၀၀) ကျော် ကို အခမဲ့ကုသပေးလျှက်ရှိသည်။ သုခကုသိုလ်ဖြစ်ဆေးခန်းသည် ဆေးခန်းသန့်ရှင်းရေး၊ ပိုးမွှားများ သန့်စင်ရေးအတွက် လကုန်ရက် (၁) ရက်တည်းသာ ပိတ်ရက်အဖြစ် သတ်မှတ်ထားပြီး စေတနာရှင် ဆရာဝန်ကြီးများ (၅၀) ဦးခန့်ဖြင့် အခမဲ့ ကုသပေးလျှက်ရှိသည်။ ထိုသို့ကုသပေးရာတွင် မျက်စိ၊ အရိုး အကြော၊ နား နှာခေါင်း လည်ချောင်း၊ မီးယပ်သားဖွား၊ အပ်စိုက်၊ အရေပြား၊ ကလေးအထူးကု၊ အထွေထွေရောဂါ၊ အသေးစားခွဲစိတ်မှုများ၊ ဓါတ်ခွဲခန်း၊ ဓါတ်မှန်ခန်း၊ E.C.G၊ U.S.Gနှင့် မကြာမီ ရက်ပိုင်းအတွင်း မျက်စိခွဲစိတ်ခန်းကိုပါ ဖွင့်လှစ်နိုင်တော့မည်ဖြစ်သည်။
သုခကုသိုလ်ဖြစ်ဆေးခန်းမှ ကိုယ်တိုင်ကိုယ်ကျ ကုသမှုမပေးနိုင်သော ဝေဒနာရှင်များအား သက်ဆိုင်ရာ ဆေးရုံများသို့ ပို့ဆောင်၍ ကုသစားရိတ်အား သတ်မှတ်ချက်ဖြင့် အကုန်အကျခံကာ ကူညီကုသပေးလျှက်ရှိရာ ၂၀၁၁ ခုနှစ်၊ မတ်လအတွင်း၌ ဧရာဝတီတိုင်းနေ မနှင်းနုဇော် အသက် (၁၄) နှစ် အရွယ်ရှိ (၇) တန်းကျောင်းသူ မိန်းကလေးငယ်သည် ငယ်စဉ်အရွယ်က နေအိမ်ရှိ မီးဖိုခန်းအတွင်း ရေနွေးအိုးပေါ်သို့ မှောက်လျက်လဲမိရာမှ မေးရိုး၊ ရင်ဘတ်နှင့် ပေါင်တံတို့တွင် ရေနွေးပူလောင်ကျွမ်း ကာ အရေပြားများ ပျက်စီးသွားခဲ့သည်။ ယင်း ဒဏ်ရာဒဏ်ချက်သည် ငယ်စဉ်အရွယ်၌ မိဘများက သတိမထားမိသော်လည်း ယခု (၇) တန်း ကျောင်းသူအရွယ်သို့ ရောက်ရှိသောအချိန်တွင် ထို မီးလောင်ဒဏ်ရာကြောင့် ဖြစ်ပေါ်လာသော အမာရွတ်ဆိုးကြီးသည် ကလေးငယ်၏ ဘ၀ရှင်သန်မှု အား အကြီးမားဆုံး အနှောင့်အယှက်ဖြစ်စေတော့သည်။ စာသင်ကျောင်းသို့ သွားရာတွင် သူငယ်ချင်း အပေါင်းအသင်းများမှ မခေါ်မပြော ပြုလုပ်ခြင်း၊ အိမ်နီးပါတ်ဝန်းကျင်တွင်လည်း ကစားဖော်မရှိခြင်း တို့ကြောင့် ကလေးငယ်မှာ စိတ်ခံစားမှုများ ဖြစ်ပေါ်လာတော့သည်။ ထို့ကြောင့် မိဘများမှ ရန်ကုန်မြို့ မင်္ဂလာဒုံမြို့နယ်နေ ဦးဋ္ဌေးလွင်မှတဆင့် သုခကုသိုလ်ဖြစ်ဆေးခန်း(ရန်ကုန်)သို့ ဆက်သွယ်ကာ ကလေးငယ်၏ မေးစေ့အသားအရေမှ ရင်ညွန့်အထိ တွဲကပ်နေသော ရေနွေးပူလောင် အရေပြားကြီး အား ကလေးငယ်၏ ဘ၀ရှေ့ရေးအတွက် လာရောက်အကူအညီတောင်းခဲ့ကြသည်။
ထို့ကြောင့် နာရေးကူညီမှုအသင်း(ရန်ကုန်)မှ သုခကုသိုလ်ဖြစ်ဆေးခန်းမှတဆင့် ရန်ကုန် ဆေးရုံကြီးသို့ ပို့ဆောင်၍ ခွဲစိတ်ခန်းခဖိုးငွေ ပေးအပ်ကာ ကလေးငယ်၏ အနာဂတ်ရေးအား ရှေးရှုကာ ကူညီဖေးမမှုကို ပြုလုပ်နိုင်ခဲ့သည်။ ခွဲစိတ်ပြီးသည့်နောက် ကလေးငယ်နှင့် အုပ်ထိန်းသူ မိဘများမှ နေရပ်ဖြစ်သော ဧရာဝတီတိုင်းသို့ မပြန်မီ သုခကုသိုလ်ဖြစ်ဆေးခန်းသို့ လာရောက်ကာ ကျေးဇူးတင် ၀မ်းသာစကားကို ပြောကြားခဲ့ကြသည်။ ယခုမူ မနှင်းနုဇော် တစ်ယောက် ရယ်နိုင်၊ ပြုံးနိုင်၊ သူငယ်ချင်း အပေါင်းအသင်းများနှင့် လက်ချင်းတွဲကာ လူ့ဘ၀ခရီးလမ်းကြောင်းပေါ်တွင် အနိုင်မခံ အရှုံးမပေး၊ မားမားမတ်မတ် လျှောက်လှမ်းနိုင်တော့မည် ဖြစ်ပါသည်။
ကိုကျော်သူ
0 comments:
Post a Comment
လာရောက်လည်ပတ်ကြသော မိတ်ဆွေတို့ရဲ့အမြင်များလည်း ရေးနိုင်ပါတယ်