1 တို့ ပြည်သူတွေ မြန်မာငွေ ငါးထောင်နဲ့ မိုဘိုင်းသုံးခွင့်ရမှာလား

9 ရက်နေ့က မြန်မာ့ဆက်သွယ်ရေး လုပ်ငန်းရဲ့ သတင်းစာရှင်းလင်းပွဲ

သိပ်မကြာသေးခင်ရက်ပိုင်းက ငွေငါးထောင်နဲ့ ဂျီအက်စ်အမ်မိုဘိုင်းလ်ဖုန်း သုံးလို့ ရအောင်လုပ်မယ့် စီမံကိန်းတစ်ခုကို နိုင်ငံတော် သမ္မတရုံးကို ပရိုပိုဆယ်လ် တင်ထားတယ်လို့ ရွှေပြည်တံခွန် ကုမ္ပဏီက ၃-၁-၂၀၁၂ နေ့ ပါ့ခ်ရွိုင်ရယ်လ်မှာ လုပ်ခဲ့တဲ့ သတင်းစာရှင်းလင်းပွဲ မှာ ပြောခဲ့ တယ်ဆိုတဲ့ သတင်းလေးလဲ အားလုံးကြားကြမယ်လို့ ထင်ပါတယ်။

အဲလို ဘဲ မြန်မာပြည်က လူတန်းစားအလွှာ အသီးသီးကလဲ ၀မ်းသာအားရ ကြိုဆိုချင်ခဲ့ကြတဲ့ သတင်းပါ။ အန်တီကြီးတစ်ဦးဆို ဘာပြောလဲ ဆိုတော့ အဲဒီ ဖုန်းထွက်ရင် ငါ့ယောင်္ကျားကို တစ်လုံးဝယ်ပေးထားဦးမှဘဲ ဆိုပြီး ပြောရှာပါတယ်။ ဒါမှ အိမ်မှာ အလုပ် ပေါ်ရင် ချက်ချင်းဆက်သွယ် လို့ရမယ်ပေါ့။ သူပြောလိုက်တာ ရယ်စရာမဟုတ်ပါဘူး ။ သူတကယ်နှစ်နှစ်ကာကာ ပြောလိုက်တာပါ။ ဒါဟာ ဆက်သွယ်ရေးပါ။ အားလုံး လိုချင်တဲ့ မျှော်လင့်ချက်ပါ။ အရင်တုန်းက ကိုရီးယား ကားလေးတွေထဲ က ကျောင်းသားလေးတွေ ဟန်းဖုန်းတကိုင်ကိုင်ကို တီဗွီမှာ မြင်ရပြီး အားကျခဲ့ကြရတဲ့ ပြည်သူလူထုကြီးတရပ်လုံးက ၀မ်းသာအားရ ။ ငါ့သားလေးကို ကျောင်းသွားရင်လဲ ဟန်းဖုန်းလေး ၀ယ်ပေးထားမှ။ ဒါဆို သူ တစ်ခုခု ဖြစ်ရင် ငါ့ကို ချက်ချင်းဆက်သွယ်လို့ရတယ်။ ဒီလို အသေးဖွဲလေးတွေကနေ လုပ်ငန်းအလယ်လတ် လုပ်ကြသူတွေ အဆုံး ဒီသတင်း ကြားမှာ ပြုံးလို့ပျော်လို့ ပေါ့။ အိမ်နီးနားချင်းတိုင်းပြည်တွေနဲ့ ပခုံးတိုက်ပြီး တို့လဲ မိုဘိုင်းဖုန်းလေးတွေ သုံးနိုင်ပြီဆိုပြီး မော်လို့ ကျော်လို့ တော်လို့တောင်ပြောလို့မရတဲ့ သတင်းလေ။

အဲဒီသတင်းနဲ့ မရှေ့ မနှောင်းမှာဘဲ မြန်မာ့ဆက်သွယ်ရေးလုပ်ငန်း၊ ကြေးနန်း ဆက်သွယ်ရေးနှင့် စာတိုက် သင်တန်းကျောင်းမှာ မြန်မာ့ဆက်သွယ်ရေး လုပ်ငန်းက လက်ရှိပေးနေတဲ့ ဝန်ဆောင်မှုတွေနဲ့ ပတ်သက်ပြီး ပြုလုပ်တဲ့ သတင်းစာ ရှင်းလင်းပွဲ အပြီးမှာ သတင်းအချက်အလက်နှင့် နည်းပညာဌာန အင်ဂျင်နီယာချုပ် ဦးဇော်မင်းဦး ကို သတင်းသမား တစ်ဦးဦး က အင်တာဗျူး ခဲ့ပုံရတဲ့ သတင်းလေးကလဲ ပြန့်လွင့်လာပြန် ကော ။ အဲဒီဟာကို ဗျာ အတိုချုပ်ပြန်ပြောရရင်တော့ ဥပဒေအရ မဖြစ်နိုင်သေးဘူး ဆိုတဲ့ ဟာက တစ်ချက်ပေါ့ ။ ဆက်သွယ်ရေးလုပ်ငန်းကို နိုင်ငံတော်အနေနဲ့သာ လုပ်ခွင့်ပေးထားတယ်ပေါ့ ဒီလို မျိုး ဖြေသွားတယ်။ အဲလိုလေးဖတ်လိုက်ရပါတယ်။ နောက်တစ်ချက်က ဆက်သွယ်ရေးနဲ့ ပေါင်းလုပ်မှ ဖြစ်မယ် ။ အဲလိုမျိုးလဲ ပြောသွားတာတွေ့ရပါတယ်။ နောက်တစ်ခုက ဆက်သွယ်ရေးနဲ့ ပေါင်းမလုပ်ရင် အခု ဆက်သွယ်ရေးက ချပေးထားတဲ့ ဖုန်းတွေ ကို ခေါ်ဆိုလို့ မဖြစ်နိုင်တာရယ် ။ နိုင်ငံခြားကို ဖုန်းခေါ်ဖို့ အတွက်ကိုလဲ ဆက်သွယ်ရေး လက်အောက်ကွန်ယက်ကို သာ ဖြတ်ရမှာမို့ မဖြစ်နိုင်တာရယ် ကို ပြောသွားတာတွေ့ရတယ်။ နောက်တစ်ချက်က ဆက်သွယ်ရေးကို မဆက်သွယ်ဘဲ နိုင်ငံတော် သမ္မတရုံးကို တင်ခဲ့တာ မို့ ဆက်သွယ်ရေး အနေနဲ့ သေချာမသိလို့ ထင်မြင်ချက်မပေးလိုဘူးလို့ ပြောခဲ့တာလဲ တွေ့ခဲ့ရတယ်။

မျှော်နေတဲ့ လူထဲလဲ အဲ ဒီ သတင်းနှစ်ပုဒ်ကြားမှာ မပြုံးဘဲ နဲ့ ၀ါးလုံးကွဲ ရယ်ဖို့ အတော်ခက်လို့ အပျော်လေးတွေလဲပျက်သလိုလို ဖြစ်သွားကြရတယ်ပေါ့ဗျာ။ ဒါပေမယ့် သမ္မတရုံးက ဒါကို ဘယ်လို အဖြေပေးမယ်ဆိုတာတော့ ခုထိ မသိသေးပါဘူး ။

နိုင်ငံတော်ဖွဲ့ စည်းပုံ အခြေခံဥပဒေရဲ့ အပိုဒ် (၃၅) မှာ ရေးထားတာက"နိုင်ငံတော်၏ စီးပွားရေး စနစ် သည် ဈေးကွက် စီးပွားရေး စနစ်ဖြစ်သည်။ ဆိုတာပါပါတယ်။ ဒါဟာ ဈေးကွက်စီးပွားရေး ရှုထောင့်ကနေ ကြည့်ရင် တော့ ခွင့်ပြုပေးချင်စရာပါ။ နိုင်ငံတကာမှာလဲ ဆင်းကဒ်တွေရဲ့ ဈေးက အဲလောက်ဘဲရှိပါတယ်။ ပြည်တွင်းခေါ်ဆိုခတွေဆိုလဲ သိပ်သက်သာပါတယ်။

အပိုဒ် (၃၆)

နိုင်ငံတော်သည်

(က) အမျိုးသားစီးပွားရေး တိုးတက် ဖွံ့ဖြိုးရေးအတွက် နိုင်ငံတော်၊ ဒေသဆိုင်ရာ အဖွဲ့ အစည်းများ ၊ ဖက်ဆက်အဖွဲ့ အစည်းများ ၊ ပုဂ္ဂလိက စသည့် စီးပွားရေးလုပ်ငန်းစု အားလုံးကို စီးပွားရေးလုပ်ငန်းများတွင် ပါဝင်ဆောင်ရွက်ခွင့်ပြုသည်လို့ ရေးထားပါတယ်။ ဒီတော့ ဒါဟာ နိုင်ငံတကာမှာ private လုပ်ခွင့်ပြုထားတဲ့ စီးပွားရေးလုပ်ငန်းဖြစ်တာမို့ နိုင်ငံတော်က သေချာစဉ်းစားပေးလိမ့်မယ်လို့ ထင်ရဖွယ်ရှိပါတယ်။

အပိုဒ် ၃၆ (ခ) မှာဘဲ စီးပွားရေးလုပ်ငန်းများတွင် တရားသဖြင့် ယှဉ်ပြိုင်ခြင်းကို ပျက်ပြားစေရန် တစ်ဦးတစ်ယောက်က ဖြစ်စေ၊ အစုအဖွဲ့က ဖြစ်စေ လက်ဝါးကြီးအုပ်ဆောင်ရွက်မှု သို့မဟုတ် ဈေးကစားမှု ပြုခြင်းဖြင့် အများပြည်သူတို့၏ အကျိုးစီးပွားကို ထိခိုက်နစ်နာစေချင်းမှ တားစီး ကာကွယ် ရမည်

ဆိုတာပါလေတော့ ဒါဟာ စီးပွားရေးလုပ်ငန်းတစ်ခုက တရားသဖြင့်ယှဉ်ပြိုင်ဖို့ ၀င်လာတာသာဖြစ်ပါတယ်။ နိုင်ငံတကာ နဲ့ ယှည်ရင် မြန်မာပြည်ရဲ မိုဘိုင်းဆင်းကဒ် ဈေးဟာ သိပ်ကြီးမြင့်နေသေးတာမို့ လူထုဘက်ကကြည့်ရင် ဒါဟာ သုံးစွဲနေရသူ လူထု အတွက် အကျိုးစီးပွားထိခိုက်ပါတယ်။ ဒီတော့ ဒီယှဉ်ပြိုင်မှုကို သမ္မတရုံး က ခွင့်ပြုမှာ လား မပြုဘူးလားဆိုတာကလဲစောင့်ကြည့်ချင်စရာပါ။

အပိုဒ် ၃၆ (ဂ) မှာဘဲ ဘာထပ်ပါသေးလဲ ဆိုတော့ အများပြည်သူတို့၏ နေထိုင်မှု အဆင့်တန်း မြှင့်တင်ရေးနှင့် အထွေထွေ အရင်းနှီးများ တိုးတက်ဖွံ့ဖြိုးရေးတို့ကို ရှေးရှု ဆောင်ရွက်မည် ဆိုတဲ့ အချက်ကို ပြန်ကြည့်မယ်ဆိုရင်လဲဒီလို အဖိုးနဲ ဖုန်းတွေသာ လူထုက တကယ်သုံးနိုင်ရင် လူထုအတွက် စီးပွားရေး လုပ်ဆောင်ရာမှာ ဖြစ်စေ အခြားသော ကျန်းမာရေး လူမှု ဆက်ဆံရေး အခြေနေများအတွက်ပါ အသုံးဝင်လှတာမို့ ဒါဟာ လူထုအတွက် အကျိုးတကယ်ရှိစေမယ့် အရာလေးကလဲ ဖြစ်နေပြန်တော့ သမ္မတရုံး ရဲ့ ဆုံးဖြတ်ချက်လေးကို ကြည့်ရဦးမှာပေါ့။

တစ်ချို့သောစီးပွားရေးလုပ်ငန်းတွေကို နိုင်ငံတော် အနေနဲ့ ၀င်ရောက်လုပ်ကိုင်ရခြင်းရဲ့ ရည်ရွယ်ချက် တစ်ခုမှာ က လူထု အကျိုးစီးပွားအတွက် အရှုံးခံသင့်တဲ့ စီးပွားရေးလုပ်ငန်းမျိုး အဲလို အခြေနေမျိုးတွေမှာ လူထု ကိုငဲ့ကွက်ပြီး အစိုးရက လုပ်တာရှိပါတယ်။ ယခု မိုဘိုင်းဖုန်းဟာ ဆက်သွယ်ရေးထက် သက်သက် သာသာ လုပ်ပေးနိုင်တာမျိုးပေါ်လာတဲ့ အခါမှာ ကြိုဆိုမလား ။ မကြိုဆိုဘူးလားဆိုတာကတော့ ပြောရ ခက်နေပါသေးတယ်။ ကဲ ဘယ်လို ဘယ်ပုံ လုပ်ဆောင်ကြမလဲဆိုတာတော့ ကျနော်လဲ မသိတာမို့ ကိုယ့် ဘာကိုယ်သာ တွေးကြည့်ကြပါလို့ တိုက်တွန်းပါရစေ။

Ko Wai(ကိုဝေ)