ဒီတော့ဗျာ စင်္ကာပူဆိုတာ ... အာဏာရှင် တပိုင်း ဒီမိုကရေစီ ဖြစ်လာပါတယ်။ ပြောရရင် ကြံခိုင်ရေးပါတီရဲ့ အချိုးမျိုးပေါ့။ ငါတို့ကို မဲပေးရင် .. ဟိုဟာ ဒီဟာ လုပ်ပေးမယ်၊ မဲမပေးရင် မလုပ်ပေးဘူး ဆိုတဲ့ သဘောပေါ့။
မြန်မာနိုင်ငံကို စင်္ကာပူလို အာဏာရှင်တပိုင်း ဒီမိုကရေစီ မဖြစ်စေချင်ဘူး လို့ ပြောလာတဲ့ စာတစ်ခုပါ။ အဲဒီစာကို ဖတ်လိုက်ရတော့ .. ဝမ်းသာမိတာ တစ်ခုကို ပထမဦးဆုံး ပြောလိုပါတယ်။ အဲဒါကတော့ .. မြန်မာပြည်ကို စစ်အာဏာရှင် အောက်နေလွတ်အောင် ဘယ်လို လုပ်ကြမလဲဆိုတဲ့ စကားလုံးတွေနေရာမှာ မြန်မာပြည်ကို စင်္ကာပူလို အာဏာရှင် တစ်ပိုင်း မဖြစ်စေလိုတဲ့ ဆန္ဒပါတဲ့ စာဖြစ်နေလို့ပါပဲ။ သဘောကတော့ မြန်မာပြည်သူတွေရဲ့ အမြင်ဟာ အာဏာရှင် တော်လှန်ရေးကို ကျော်လွန်ပြီး တိုင်းပြည် တည်ဆောက်ရေးကို ဦးတည်တဲ့ နိုင်ငံရေး ရည်မှန်းချက်တွေ တွေ့လာရလို့ပါပဲ။
သူအဓိက ပြောလိုတာကတော့ အာဏာကို ပါတီ တစ်ခုတည်းက ချုပ်ကိုင်ထားပြီး .. အဲဒီ ပါတီကနေ အာဏာကို အခွင့်အရေးနဲ့ လဲလှယ်တာကို ပြည်သူတွေကလည်း မတရာမှန်း သိသိကြီးနဲ့ လိုက်ပါလုပ်ဆောင်နေရတယ် .. ဆိုတဲ့ စာပါ။ သူပြောထားတဲ့ စာတွေထဲက တစ်ကြောင်းက ...
"First world country လို့ သူတို့ကိုယ်သူတို့ ကြွေးကြော်လေ့ရှိတဲ့ စင်ကာပူလူမျိုးများဟာ အစိုးရ မကျေနပ်ကြောင်း တွင်တွင်ပြောပြီး မဲထည့်ရင်တော့ အတိုက်အခံနိုင်ရင် သူတို့ HDB တိုက်ခန်းတွေ ဈေးကျမှာစိုးလို့၊ ပလက်ဖောင်းမှာ အမိုး မိုးမပေးမှာစိုးလို့ စတဲ့ အချက်တွေနဲ့ အာဏာရပါတီသာ ပေးလေ့ရှိပါတယ်။" ... တဲ့။
ဒီတော့ဗျာ စင်္ကာပူဆိုတာ ... အာဏာရှင် တပိုင်း ဒီမိုကရေစီ ဖြစ်လာပါတယ်။ ပြောရရင် ကြံခိုင်ရေးပါတီရဲ့ အချိုးမျိုးပေါ့။ ငါတို့ကို မဲပေးရင် .. ဟိုဟာ ဒီဟာ လုပ်ပေးမယ်၊ မဲမပေးရင် မလုပ်ပေးဘူး ဆိုတဲ့ သဘောပေါ့။
နိုင်ငံရေး စကားလုံးတွေ မပါဘဲ သာမန် အရပ်စကားနဲ့ ပြောရရင် .. အဲဒီလို ကိစ္စမျိုးကို ကျွန်တော်တို့ ပြည်သူတွေက လက်မခံဘူးဆိုတာကို ... ဒေါ်အောင်ဆန်းစုကြည်ရဲ့ စည်းရုံးရေး ခရီးစဉ်တွေနဲ့ အခု ကြားဖြတ်ရွေးကောက်ပွဲတွေမှာ ပြည်သူတွေက လက်တွေပြခဲ့ပြီးပြီ။ စင်္ကာပူလို ဖြစ်မလာဖို့ အဲဒီ စိတ်ဓါတ်ကို ဆက်မွေးဖို့ပဲ လိုပါတယ်။
နိုင်ငံရေး အရ ပြောရရင်တော့ စင်္ကာပူနိုင်ငံရဲ့ နိုင်ငံရေး စနစ်ကို အီလစ်ဘရယ် ဒီမိုကရေစီ (illiberal democracy) လို့ ခေါ်ကြပါတယ်။ လုပ်ငန်းစဉ် ဒီမိုကရေစီကိုသာ အသက်သွင်းထားပြီး၊ ဒီမိုကရေစီ တန်ဖိုးတွေကို ဂရုတစိုက် ဖေါ်ဆောင်မှုမှာ အားနည်းလို့ ဖြစ်ပါတယ်။ အရမ်းပါးလွှာလွန်းတဲ့ ဒီမိုကရေစီ စနစ်လို့ ဘာသာပြန်ရမယ် ထင်ပါတယ်။
ရွေးကောက်ပွဲရှိတယ်၊ ပါလီမာန်ရှိတယ်။ အတိုက်အခံ ပါတီတွေရှိတယ်။ စီးပွားရေး လွတ်လပ်ခွင့်ရှိတယ်။ နိုင်ငံရေးနဲ့ မသက်ဆိုင်တဲ့ ကောင်းမွန်တဲ့ တရားရေး စနစ်ရှိတယ်။ ဒါတွေဟာ လုပ်ငန်းစဉ်ဒီမိုကရေစီပါပဲ။
ဒီမိုကရေစီ တန်ဖိုးတွေဖြစ်တဲ့ ... လူ့အခွင့်အရေးလိုက်နာမှု အားနည်းပါတယ်။ နိုင်ငံရေးလွတ်လပ်ခွင့်၊ တန်းတူညီမျှတဲ့ အခွင့်အရေး၊ .. စတဲ့ တန်ဖိုးတွေ ကင်းမဲ့နေပါတယ်။ ဒီတော့ ဒီစနစ်ကို မြန်မာပြည်ထဲကို တင်သွင်းဖို့ကို မလိုလားတာ ဖြစ်ပါတယ်။
မြန်မာနိုင်ငံမှာ.. နိုင်ငံရေး ယဉ်ကျေးမှုနဲ့ လိုက်ဖက်တဲ့ ဒီမိုကရေစီတန်ဖိုးတွေကို ကျွန်တော်တို့ နိုင်ငံထဲ တင်သွင်းရမှာ ဖြစ်ပြီး၊ စင်္ကာပူမှာ ရှိတဲ့ .. လုပ်ငန်းစဉ် ဒီမိုကရေစီ ပုံစံထက် ပိုတဲ့ ... ဒီမိုကရေစီ တန်ဖိုးတွေကိုလည်း အမိအရ တင်သွင်းရမှာ ဖြစ်ပါတယ်။
နိုင်ငံရေး ယဉ်ကျေးမှု (political culture) ဆိုတာကလည်း အရေးကြီးတဲ့ ကဏ္ဍ တစ်ခုဖြစ်ပါတယ်။ မြန်မာပြည်ဟာ တိုင်းရင်းသားတွေကို အခြေခံတဲ့ နိုင်ငံရေး ယဉ်ကျေးမှုပုံစံ ရှိတာကြောင့် အဲဒီအရေးနဲ့ လိုက်ဖက်မယ့် ပုံစံကို အဓိကထား တင်သွင်းရမှာ ဖြစ်ပါတယ်။
ဒါ့အပြင် လက်တွေ့ဆန်ဆန်လည်း အဲဒီ စံတွေ၊ တန်ဖိုးတွေကို တဖြည်းဖြည်းနဲ့ နိုင်ငံတွင်း အသက်သွင်းသွားရမှာ ဖြစ်ပါတယ်။ ရုတ်တရက် အကုန်လုံးကို ချက်ခြင်း လဲထုတ်လို့ မရသေးပါဘူး။ ခြေလှမ်းမှန်မှန်နဲ့ ပြောင်းလဲ ယူရမှာ ဖြစ်ပါတယ်။ (ဆိုလိုတာက ပြောင်းလဲမှုတွေကို ဆက်တိုက် ဖြစ်ပေါ်နေဖို့ လိုပါတယ်။ နေ့ခြင်း ညခြင်းတော့ မဖြစ်နိုင်ပါ။)
ဒါကြောင့် အခုလို နိုင်ငံရေး ရည်ရွယ်ချက် ပါဝင်တဲ့ ဆွေးနွေးမှုတွေကို များများ လုပ်ဆောင်နေသမျှနဲ့ .... ပြည်သူတွေက "အာဏာကို အခွင့်အရေးနဲ့ လဲလှယ်မှု" တွေကို ဆန့်ကျင်နေသမျှ ကာလပတ်လုံး မြန်မာပြည်ဟာ စင်္ကာပူပုံစံ အီလစ်ဘရယ် ဒီမိုကရေစီကို မသွားဘူးဆိုတာကို ပြောရဲပါတယ်။ စင်္ကာပူနိုင်ငံရေး ပုံစံမဖြစ်ဖို့ရာ ကျွန်တော်တို့ အားလုံးမှာ အဓိက တာဝန်ရှိတယ်လို့ ပြောချင်ပါတယ်။
Ko Htike facebookမှ
0 comments:
Post a Comment
လာရောက်လည်ပတ်ကြသော မိတ်ဆွေတို့ရဲ့အမြင်များလည်း ရေးနိုင်ပါတယ်