0 ခောတ်သစ် ဆောင်ပုဒ် (သို့) ရွှေအိုးပေးမှ ပညာရ။

နအဖရေးဆွဲတဲ့ ၂၀၀၈ ဖွဲ့စည်းပုံအခြေခံ ဥပဒေ အခန်း(၁) နိင်ငံတော်အခြေခံမူများတွင် ဥပဒေပုဒ်မ၂၈ ပုဒ်ခွဲ(ဂ)အရ နိင်ငံတော်သည်-
(ဂ)အခမဲ့မသင်မနေရ မူလတန်း ပညာရေးစနစ်ဖော်ဆောင်မည် ဟုဆိုခဲ့သလို အစိုးရမှ ယခု စာသင်နှစ်ကျောင်းဖွင့်ရာသီတွင် အခြေခံပညာမူလတန်း ကျောင်းများ ၌ အခမဲ့ ကျောင်းအပ်နိင်ကြောင်း ကြေငြာထားသော ဆိုင်းဘုတ်များအား အခြေခံပညာမူလတန်း ကျောင်းများ အားလုံးလိုလိုတွင် တွေ့မြင် ခဲ့ကြရပါသည်။ထိုသို့ စိတ်ချမ်းမြေ့ ဖွယ်ရာ ပညာသင်ကြားမှုအခြေအနေ ပြောင်းလဲလာမှုအား ၀မ်းသာ မဆုံးခင်ပင် အချို့သော ကျောင်းများမှ ကျောင်းအပ်ခမယူသော်လည်း ဘိလပ်မြေ ဘယ်နှစ်အိတ် အလှူခံ ကြောင်း ဘိလပ်မြေအိတ်ဖိုး ဘယ်၍ဘယ်မျှ ကျကြောင်း နောက်ဆက်တွဲ သတင်းတွေ ကြားရပြန်တော့ဥပဒေကိုမသိတာလား၊ဥပဒေအသိမရှိတာလားလို့ မေးခွန်း ထုတ်စရာ ဖြစ်လာပါတယ်။

သတင်းစာဖိုး
Report-card
စာမေးပွဲဖြေသောစာအုပ်
မေးခွန်း
သန့်ရှင်းရေး များအတွက်ပိုက်ဆံ ၁၀၀၀၀/ိတစ်သောင်းကျပ်တိတိယူလာပါရန်အသိပေးအပ်ပါသည်။

အထက်ဖော်ပြပါပုံမှာ 25.5.2011(တနင်္လာနေ့)တွင် အ.မ.က(၁)ဗဟန်း အခြေခံပညာမူလတန်း ကျောင်းအုပ်ဆရာမကြီး ဒေါ်လှဝင်းယဉ်၏ ညွှန်ကြားချက်ဖြင့် အခြေခံပညာမူလတန်း အ.မ.က(၁)ဗဟန်းမှ ဒုတိယတန်းစာသင်ခန်းများတွင် ဆရာ/ဆရာမများက စာသင်ဘုတ်ပေါ်တွင် ရေးသားပေးသည်ကို ကျောင်းသူ/ ကျောင်းသား များမှ မိဘများအားပြန်လည်ပြသရန်ကူးယူရေးသားလာခြင်းဖြစ်ပါသည်။ ထိုအကြောင်းအရာနှင့်ပါက်သက်၍ အ.မ.က(၁)ဗဟန်းကျောင်းမှ ဒုတိယတန်း ကျောင်းသူ / ကျောင်းသားများ၏မိဘအချို့မှာအလွန်ပင်အကျပ်ရိုက်နေကြရပါသည်။

“ကျွန်တော်က ဒီကျောင်းမှာ ကျောင်းသားသုံးယောက်ရှိတာ…..စီးပွားရေးကလဲ သိပ်မကောင်းဆိုတော့…ဘယ်လိုလုပ်ရမှန်းမသိပါဘူးဗျာ…”ဆိုတဲ့ကျောင်းသားဖခင် တစ်ဦးရဲ့စကားသံမှ မဆုံးသေးခင်မှာ………ကျောင်းသူတစ်ဦးရဲ့မိခင်နဲ့ဖခင်ကတော့“မပေးနိင်ဘူးဗျာ……..ဘယ်……အနုကြမ်းစီးခံနေရသလိုပဲ….အခမဲ့ပညာရေးလဲဆိုသေး ကျောင်းအပ်တုန်းကလဲ စေတနာရှိသလောက်လှူပါဆိုပြီး ၅၀၀၀ထက်နည်းရင် မျက်နှာတွေကပျက်နေလို့ ၅၀၀၀ကျပ် ထည့်ခဲ့ရတယ်။တက်နိင်တဲ့သူတွေက တော့ငွေ(၄/၅)သောင်းကနေ သိန်းကဏန်းထိ ထည့်သွားကြ တာပေါ့ဗျာ။ ရှင့်ကိုမပြောဖြစ်တာ။၎.၇.၂၀၁၁တုန်းကလဲ ဗလာစာအုပ်နဲ့ခဲတံဖိုးဆို ၃၀၀၀ကျပ် တောင်းလို့ ပေးလိုက်ရ သေးတယ်။နောက်တစ်ခါလဲပေးရသေး တယ်ဗျ။ ဘာဖိုးလဲ ဆိုတာတော့ မမှတ်မိတော့ဘူး။အခုတစ်ခါ………………… ငွေတစ်သောင်းတဲ့ဗျာ။ ဒုတိယတန်းကျောင်းသူ/ကျောင်းသားတွေ ချည်းပဲ ကောက်တယ် ထား။ဒါလဲ ကျန် ကျောင်းသားတွေ လွတ်မယ်မထင်နဲ့နော်။အခု လောလောဆယ် ပြောတာ။ နှစ်တန်းကျောင်းသူ/ကျောင်းသားအခန်းချည်းကို (၅)ခန်း ရှိတယ်။ တစ်ခန်းကို ကျောင်းသူ/ကျောင်းသား၆၀အနည်းဆုံးရှိတယ်။(၅)ခန်းဆို တော့ ကျောင်းသား (၃၀၀) ပဲထား တစ်ယောက် တစ်သောင်းဆိုတော့ အယောက်(၃၀၀) ငွေသိန်း (၃၀)ဆယ် ဘယ် နေရာမှာ ဒီလောက်ကုန်မှာမို့လဲ။စာလေး ရေးပေးလိုက်တာ ဆရာမ တွေအတွက် တော့ ဘယ်ခက်မလဲ ဆော့ပင်လေးကိုင် ၀ှုက်ဘုတ်ပေါ်မှာ ရေး… ဒါပဲလေ… အဲ……အဲဒီငွေတော့ရဖို့ကတော့ ဒီမောင်တွေ ဒီမိတွေကတော့ ကုန်းတော့ ရုံးတော့ပဲဗျာ…မကျေနပ်ဘူးဗျာ…ကျုပ်အဖေကတော့ပေးကိုမပေးနဲ့ပြောတာဗျ။” အသံတွေနဲ့ဝေးရာထွက်သွားဖို့ဆုံးဖြတ်ပြီးထွက်လာစဉ်မှာပဲနားထဲကိုနှုတ်ဆက် ကြားလိုက်ရတဲ့ မိဘတစ်ဦးရဲ့စကားသံကတော့………..
“အင်း…ဖေကြီးရေ…တော်မှာလဲရှာလိုက်ရတာ ကျုပ်လဲထိန်းသိမ်းတာပါပဲတော် …

ကလေးပညာရေးဆိုတော့လဲအမေ့ဆေးဖိုးထဲကပဲလောလောဆယ်ထည့်သုံးရတော့မှာ ပါပဲရှင်…ပညာရွေအိုး လူမခိုး ဆိုတဲ့ ဆိုရိုးသာ ကြားဖူးခဲ့တာ အခုသမီးတို့ ခောတ်ရောက်မှပဲ ရွှေအိုးပေးမှ ပညာရ လို့တောင်ပြောင်းရမလိုဖြစ်နေပါပြီတော်…”
ရယ်လိုက်ရမှလား ငိုရတော့မှာလား မသိအောင် မိဘတွေရဲ့ ညည်းတွားသံတွေကြား အပြုံးစတစ်ခုနဲ့ဆက်တွေးမိတယ်။ ၂၀၀၈ဖွဲ့စည်းပုံအခြေခံဥပဒေ အခန်း(၁)နိင်ငံတော်အခြေခံမူများတွင်ဥပဒေပုဒ်မ ၂၈အရနိင်ငံတော်သည်-
(ဂ)အခမဲ့မသင်မနေရ မူလတန်းပညာရေးစနစ်ဖော်ဆောင်မည် ဆိုတာ ကျောင်းအပ်ခကိုပဲ အခမဲ့ ဖြစ်စေမှာလား ကျောင်းသင်ယူထောက်ကူပစ္စည်းတွေနဲ့ သတင်းစာဖိုးဆိုတာတွေ၊Report cardဖိုးတွေ၊စာမေးပွဲဖြေသောစာအုပ်ဖိုးတွေ၊ မေးခွန်း ဖိုးတွေ၊သန့်ရှင်းရေးဖိုးဆိုတာတွေရောမပါဘူးလား။
ပညာရေးဖြင့် ခောတ်မှီ ဖွံ့ဖြိုးတိုးတက်သော နိင်ငံတော်သစ်ကြီးကို တည်ဆောက်မဲ့ နိင်ငံတော်သစ်မှာ ဆရာ မိဘတွေအပြန်အလှန် နားလည်ချစ်ခင် ယုံကြည်မှုတွေရှိဖို့ခုချိန်ခါမှာမှ မကြိုးစားနိင်ဘူး ဆိုရင်တော့ဖြင့် ပညာရွှေအိုး လူမခိုး…..ဆိုတဲ့ ဆိုရိုးကို ရွှေအိုးပေးမှပညာရ…..လို့သာ ပြောင်းရတော့မလိုဖြစ်နေပါကြောင်း ရေးသား တင်ပြအပ်ပါသည်။
သတင်းစာဖိုးအဖြစ်သတ်မှတ်ပေးထားသောစာရွက်(စုစုပေါင်းလေးရွက်)

ဝလုံး