နာရေးကူညီမှုအသင်း(ရန်ကုန်)သည် မျိုးဆက်သစ်တို့အတွက် လူမှုရေးသင်တန်း၊ ဈာပနပို့ ဆောင်ရေးသင်တန်း၊ ဆေးကူညီမှုသင်တန်း၊ အင်္ဂလိပ်စာ အခြေခံသင်တန်း၊ ပန်းချီသင်တန်း၊ ယဉ်ကျေးလိမ္မာ ဗုဒ္ဓဘာသာသင်တန်း စသည့် သင်တန်းတို့အပြင် ဖျတ်ခနဲပေါ် ဆတ်ခနဲရိုက် ဟုခေါ်သော ဓါတ်ပုံသင်တန်းကိုလည်း ဖွင့်လှစ်သင်ကြားလျှက်ရှိသည်။ ယင်းသင်တန်းကို ဈာပန ပို့ဆောင်ရေးသင်တန်းဆင်း ပရဟိတ လူငယ်/လူရွယ်များ တတ်ရောက်ကြခြင်းပင်ဖြစ်သည်။
ဓါတ်ပုံသင်တန်း သင်ကြားရခြင်းမှာ ကျွန်တော်တို့ နာရေးကူညီမှုအသင်း(ရန်ကုန်)မှ အများပြည်သူတို့၏ နာရေးရုပ်အလောင်းများ သယ်ဆောင်ရာတွင်၎င်း၊ ရဲမှုခင်းဆိုင်ရာဖြစ်သော ရေနစ် သေဆုံးမှု၊ ဆွဲကြိုးချ သေဆုံးမှု၊ ရထားကြိတ် သေဆုံးမှု၊ ပိုင်ရှင်မဲ့ သေဆုံးမှုများနှင့် တိုင်းကျိုး ပြည်ကျိုးပြု အာဇာနည်ပုဂ္ဂိုလ်/ သူရဲကောင်းတို့၏ ဈာပနအခမ်းအနားများ၊ သာသနာ့ အာဇာနည် ရဟန်း သံဃာ ဆရာတော်ဘုရားကြီးများ၏ အန္တိမဈာပန အခမ်းအနားများ စသည့် ထူးခြားသော ဖြစ်စဉ် ဖြစ်ရပ်များ၊ သုခကုသိုလ်ဖြစ်ဆေးခန်းသို့ လာရောက်ဆေးဝါးကုသကြသော ထူးခြားသည့် ရောဂါဝေဒနာရှင် လူနာများ၏ ဆေးဝါးကုသခြင်း ပုံရိပ်မှတ်တမ်းများတို့ကို နာရေးကူညီမှုအသင်း (ရန်ကုန်)၏ သမိုင်းမှတ်တမ်းများအဖြစ် ထိန်းသိမ်းထားရှိပြီး နောင်တစ်ချိန်တွင် နာရေးကူညီမှုအသင်း (ရန်ကုန်)အား ဦးဆောင်ဦးရွက်ပြုမည့် မျိုးဆက်သစ် လူငယ်/လူရွယ် ခေါင်းဆောင်များအား ကျွန်တော်တို့ နာရေးကူညီမှုအသင်း(ရန်ကုန်)၏ ပေးဆပ်ခဲ့မှု သမိုင်းစစ် သမိုင်းမှန်များကို သိရှိနားလည် သဘောပေါက်ကာ ကျွန်တော်တို့၏ ပေးဆပ်မှုထက် မနှိမ့်ကျသော သာလွန်သော ပေးဆပ်မှုများကို တိုးမြင့်၍ ပြည်သူလူထုအား အလုပ်အကျွေးပြု သွားနိုင်စေရန် ရည်ရွယ်၍ ဖျတ်ခနဲပေါ် ဆတ်ခနဲရိုက် ဓါတ်ပုံသင်တန်းအား သင်ကြားပို့ချခြင်း ဖြစ်သည်။
သင်ကြားပို့ချရာတွင် ဒီဂျစ်တယ် ကင်မရာ ကိုင်တွယ်နည်း၊ အလင်းအမှောင် ဓါတ်ပုံပညာ အယူအဆနှင့် ဖျတ်ခနဲပေါ်လာသော ပုံရိပ်တို့ကို လျင်မြန်သွက်လက်စွာ အမိအရ ရိုက်ကူးနိုင်မှု တို့ကို အဓိကထား၍ ဓါတ်ပုံပညာရှင် TV သက်မွန်မှ သင်ကြားပေးလျှက်ရှိကာ ဥက္ကဌ ဦးကျော်သူမှ သင်တန်း ဖွင့်ပွဲတွင် သင်တန်းဖွင့်လှစ်ရခြင်း၏ ရည်ရွယ်ချက်အား အသင်းသူ/သားတို့ကို ရှင်းလင်းပြောကြား သွားခဲ့သည်။ သင်တန်းကာလမှာ (၄) ပါတ်ကြာမြင့်မည် ဖြစ်ပြီး ယခု ၂၀၁၀ ခုနှစ် စက်တင်ဘာလကုန် ခန့်တွင် ဈာပနကူညီမှု (၁၀၀၀၀) ပြည့်မည့်နေ့၌ သင်တန်းသူ/သားများအား “ဘ၀နိဂုံး အဆုံးပုံရိပ်” ခေါင်းစဉ်ဖြင့် လက်တွေ့ ဓါတ်ပုံရိုက်ပြိုင်ပွဲ ကျင်းပသွားမည် ဖြစ်ပါသည်။
ကိုကျော်သူ
1 year ago
0 comments:
Post a Comment
လာရောက်လည်ပတ်ကြသော မိတ်ဆွေတို့ရဲ့အမြင်များလည်း ရေးနိုင်ပါတယ်