* ဦးနေ၀င်းရဲ့ အဝေဖန်မခံရဲတဲ့စိတ်နဲ့ သူရဲဘောကြောင်တဲ့ အာဏာယစ်မူးချင်တဲ့စိတ်ဓါတ်ကြောင့် မြန်မာနိုင်ငံမှာ လူ့အခွင့်ရေးတွေဆိတ်သုဉ်းလာခဲ့ရတယ်။ ( ဗိုလ်မူးအောင်- ရဲဘော်သုံးကျိတ်ဝင် )
ဒီနေ့စကားဝိုင်းလေးကိုစတော့ ကိုသွေးက..
“ အကို ကျနော်တို့ ဒီနေ့ လူ့အခွင့်ရေးဆိုတဲ့ခေါင်းစဉ်နဲ့ဆွေးနွေးချင်တယ် ” အားလုံးက လှုတ်လှုတ်ရွရွဖြစ်သွားပြီး တပြိုင်နက်ထဲ သဘောတူထောက်ခံခဲ့ကြတယ်။
“ သိပ်ကောင်းတဲ့ အစီအစဉ်ပေါ့ကွာ….တို့နိုင်ငံမှာ အများစုက လူ့အခွင့်ရေး ဆိုတာကို တော်တော်မသိကြတာကွ တကယ်တော့ သနားဘို့လည်းကောင်းပါတယ်…ဒီလိုဖြစ်အောင် စစ်အာဏာရှင်အဆက်ဆက်က ကြိုးစားသွားတာကိုး ဒီတော့ ပထမဆုံးစပြီးပြောချင်တာက…လူ့အခွင့်ရေးဆိုတာဘာလည်း စဉ်းစားကြည့်ရအောင်…လူမှာ မျက်လုံးတွေပါ ပါတယ်...ကြည့်ဘို့ပါ…နားတွေပါပါတယ်..နားထောင်ဘို့ပါ…ပါးစပ်တွေပါ ပါတယ်…ပြောဘို့ပါ စသဖြင့်ပေါ့…ဒါတွေဟာသဘာဝလောကကြီးကနေလူသားတွေအတွက်ဖန်တီးပေးထားတဲ့မွေးရာပါအခွင့်ရေးတွေပါ…ဒါတွေကိုလူသားအချင်း ချင်း လုပ်ဆောင်လို့မရအောင် ပိတ်ဆို့ခြင်းကို လူ့အခွင့်ရေးချိုးဖောက်တယ်လို့ဆိုပါတယ်…..”
“ အော်..ဆိုလိုတာက..ပြောချင်တဲ့ အရာတွေကို မပြောနဲ့..ကြည့်ချင်တဲ့အရာတွေကို မကြည့်နဲ့…နားထောင်ချင်တဲ့ အရာတွေကိုနားမထောင်နဲ့စတဲ့လုပ်ဆောင်ချက်တွေဟာ..လူ့အခွင့်ရေးချိုးဖောက်မူ့တွေပေါ့နော်..”စန်းမောင်ရဲ့ထိမိလှတဲ့ စကားထောက်လေးက အားလုံးရဲ့စိတ်အစဉ်ကို ထိုးဖောက်ဝင်ရောက်သွားစေခဲ့တယ်။
“ သိပ်မှန်တာပေါ့….ငါ တခါက..၀ါရင့် နိုင်ငံရေးခေါင်းဆောင်ကြီး ရဲဘော်သုံးကျိတ်ဝင် ဗိုလ်မူးအောင်နဲ့တွေ့ဆုံခဲ့တုန်းကသူပြောခဲ့တာလေးတွေသွားသတိရတယ်ကွ….လွတ်လပ်ရေးကြိုးပမ်းမူ့ကာလမှာတပ်မတော်ဖြစ်လာမဲ့ရဲဘော်သုံးကျိတ်ဘ၀မှာပေါ့…ဦးနေ၀င်း ( ဗိုလ်ချုပ်ကြီးနေ၀င်း- မြန်မာ့ဆိုရှယ်လစ် လမ်းစဉ်ပါတီ ဥက္ကဌ ကြီး- ယခု ကွယ်လွန် ) အကြောင်းကို ပြောပြဘူးတယ်….ဦးနေ၀င်းက သူများဆိုရင်ပက်ပက်စက်စက်ရစရာမရှိအောင် ဝေဖန်တတ်တယ်တဲ့ သူကို့ နည်းနည်းလေး ဝေဖန်ပြီဆိုရင်တော့..ဘာမဟုတ်တဲ့ ကိစ္စလေးကိုတောင်မှ ဒေါသတွေထွက်လာပြီးတရှုးရှုးဒေါသတွေထွက်တော့တာပဲတဲ့….တကယ်တော့အဲဒီကာလကဘာရယ်မဟုတ်ခဲ့ပေမဲ့..နိုင်ငံခေါင်းဆောင်ဖြစ်လာခဲ့တဲ့အခါမတော့..ဦးနေ၀င်းရဲ့အဝေဖန်မခံရဲတဲ့စိတ်နဲ့သူရဲဘောကြောင်တဲ့အာဏာယစ်မူးချင်တဲ့ စိတ်ဓါတ်ကြောင့် မြန်မာနိုင်ငံမှာ လူ့အခွင့်ရေးတွေဆိတ်သုဉ်းလာခဲ့ရတယ်။ ဒါဟာ လူတယောက်ရဲ့ စိတ်အပေါ်မှာအခြေခံပြီး တတိုင်းပြည်လုံးမှာရှိတဲ့ သန်းပေါင်းများစွာသောလူထုကြီးနစ်နာဆုံးရှုံးနေရတဲ့ အခွင့်ရေးတွေပါ…ခုထိပေါ့ကွာ…အဲဒီက အကျင့်ဆိုးတွေဟာ..ခု နအဖ- စစ်အာဏာရှင်တွေ လက်ထက်ထိပါလာတာပေါ့…” ကျနော်ရဲ့စကားအဆုံး စန်းမောင်က……..
“ကြည့်ပါလား…ဒေါ်အောင်ဆန်းစုကြည်ဆို..ဝေဖန်လိုက်တာရစရာမရှိဘူး…အမျိုးမျိုးသောစွပ်စွဲချက်တွေနဲ့..သူတို့ကို ဝေဖန်မယ်ဆို..ချက်ခြင်းထောင်ထဲထဲ့တော့တာပဲ…” မကျေမနပ်ပြောဆိုနေတဲ့ စန်းမောင်ကိုကြည့်ပြီး အားလုံးက ၀ိုင်းဝန်းထောက်ခံလိုက်ကြတယ်..။
“ဒီတော့..ငါတို့နိုင်ငံသားတွေဟာ..ဘယ်လိုအခွင့်ရေးတွေနစ်နာဆုံးရှုံးနေသလည်းဆိုတာ..ဆန်းစစ်ကြည့်ရအောင်…ဒီနေရာမှာ တကမ္ဘာလုံးမှာရှိတဲ့ လူသားများအတွက်ကိုရည်ရွယ်ပြီးထုတ်ပြန်ကျေငြာခဲ့တဲ့( ၁၉၄၈ ခုနှစ်၊ ဒီဇင်ဘာလ ၁၀ရက်နေ့တွင်ကမ္ဘာ့ကုလသမဂ္ဂအဖွဲ့ညီလာခံအစည်းအဝေးကြီးကလူ့အခွင့်အရေးကြေညာစာတမ်းကြီးကိုထုတ်ပြန်ကျေငြာခဲ့သည်)အချက်အလက်တွေနဲ့နှိုင်းယှဉ်ပြီးကြည့်ရအောင်…အားလုံးမဟုတ်သည့်တိုင် တိုက်ဆိုင်စွာ ချိုးဖောက်ခံနေရတဲ့တို့မြန်မာနိုင်ငံသားများရဲ့အခွင့်ရေးများပေါ့…”ကျနော်ကပြောပြောဆိုဆိုအိတ်ထဲကစာရွက်ကိုဆွဲ ထုတ်လိုက်တယ်..အားလုံးကငြိမ်သက်စွာအာရုံစိုက်နေရင်း….ကျနော်ကစာရွက်ထဲမှာရှိနေတဲ့အပိုင်းကတပိုင်းကို ဖတ်ပြလိုက်တယ်…… လူခပ်သိမ်း၏မျိူးရိုးဂုဏ်သိက္ခာနှင့်တစ်ကွလူတိုင်းအညီအမျှခံစားခွင့်ရှိသည့်အခွင့်အရေးများကိုအသိအမှတ်ပြု ခြင်းသည်လူခပ်သိမ်း၏လွတ်လပ်မှူ၊တရားမျှတမှူ၊ငြိမ်းချမ်းမှူတို့၏အခြေခံအုတ်မြစ်ဖြစ်သောကြောင့်လည်းကောင်း.... လူ့အခွင့်ရေးများကို အရေးမထား မထီလေးစား ပြုခြင်းသည် လူခပ်သိမ်း၏ အကျင့်သိက္ခာကိုချိူးဖေါက် ဖျက်ဆီးတတ်သည့်ရက်စက်ကြမ်းကြုတ်သောအပြုမှူများကိုဖြစ်ပေါ်စေခဲ့သောကြောင့်လည်းကောင်း၊ လွတ်လပ်စွာ ဖွင့်ဟပြောဆိုနိုင်မှူ လွတ်လပ်စွာ သက်ဝင်ယုံကြည်နိုင်မှူ၊ ကြောက်ရွံ့ခြင်း၊ ချိူ့ငဲ့ ခြင်းတို့မှ ကင်းလွတ်စွာအသက်မွေးနိုင်မှူတို့ကိုခံစားရယူနိုင်စေမည့်လောကတစ်ခုပေါ်ပေါက်လာရန်အရေးကိုလူ ခပ်သိမ်းတို့က မိမိတို့၏ အထက်သန်ဆုံးသော လိုလားချက်ဆန္ဒကြီးအဖြစ်ဖြင့် ကြွေးကြော် ကြေညာပြီးဖြစ်သောကြောင့် လည်းကောင်း.....
နိုင်ငံအခြင်းခြင်း ချစ်ခင်ရင်းနှီးစွာ ဆက်ဆံရေးကို ပိုမိုတိုးတက်စေရန် ကြံဆောင်ရမည် ဖြစ်သောကြောင့် လည်းကောင်း.......ကမ္ဘာကုလသမဂ္ဂအဖွဲ့ဝင်တို့သည်မူလအခွင့်အရေးများကိုလည်းကောင်း၊လူ၏ဂုဏ်သိက္ခာကိုလည်း ကောင်း၊ယောင်္ကျားမိန်းမတို့၏တူညီသည့်အခွင့်အရေးများကိုလည်းကောင်း၊လေးစားယုံကြည်ပါသည်ဟု ကုလသမဂ္ဂတွင် ထပ်မံ၍ အတည်ပြုပြီးသည့်ပြင်၊ လူမှူကြီးပွား တိုးတက်ရေးနှင့်တစ်ကွ ပိုမိုလွတ်လပ် ကောင်းမွန်သော လူ့ဘ၀ အဆင့်အတန်းတို့ကို မြှင့်တင်ရန် သန္နိန်ဌာန်ချပြီးဖြစ်သောကြောင့် လည်းကောင်း.....
ကမ္ဘာကုလသမဂ္ဂအဖွဲ့ဝင်နိုင်ငံတို့သည်ကုလသမဂ္ဂအဖွဲ့နှင့်ပူးပေါင်း၍လူ့အခွင့်အရေးများကိုလည်း ကောင်း၊ အခြေခံလွတ်လပ်ခွင့် အခွင့်အရေးများကိုလည်းကောင်း ၊ ကမ္ဘာတစ်ဝှမ်းလုံးတွင် ရိုသေလေးစားကျင့်သုံး စောင့်စည်း ကြခြင်းကို အားပေးမည်ဟု ကတိပြုပြီးဖြစ်သောကြောင့် လည်းကောင်း........
ထို့ကြောင့်...အထွေထွေညီလာခံကအပြည်ပြည်ဆိုင်ရာလူ့အခွင့်ရေးကြေညာစာတမ်းကိုလူတိုင်းအဖွဲ့အစည်း တိုင်းသည် အစဉ်နှလုံးသွင်းလျက်ကမ္ဘာတ၀ှမ်းလုံးတွင် အဆိုပါ အခွင့်အရေးများနှင့် လွတ်လပ်ခွင့်များကို ရိုသေလေးစားကြစေရန် ဆုံးမ သွန်သင်ခြင်းဖြင့် အားထုတ် ကြရမယ်ဟုလည်းကောင်း...........
ကုလသမဂ္ဂအဖွဲ့ဝင်နိုင်ငံများနှင့်ထိုနိုင်ငံတို့၏အာဏာပိုင်အတွင်းရှိနယ်ပယ်ဆိုင်ရာတိုင်းသူပြည်သား များအား အဆိုပါအခွင့်အရေးနှင့်လွတ်လပ်ခွင့်များကိုကျယ်ကျယ်ပြန့်ပြန့်ထိရောက်စွာသိမှတ်ကျင့်သုံးစောင့်စည်းကြစေရန် ပြည်တွင်းပြည်ပဆိုင်ရာတိုးတက်သောဆောင်ရွက်ချက်များဖြင့်အားထုတ်ကြရမည်ဟုလည်းကောင်း................... ရည်ရွယ်ပြီးလျှင် လူ့အခွင့်အရေးများ ဆိုင်ရာ အပြည်ပြည်ဆိုင်ရာ ကြေညာစာတမ်းကို နိုင်ငံခပ်သိမ်း၊ လူခပ်သိမ်းတို့ တပြေးညီစွာဆောင်ရွက်နိုင်ကြစိမ့်သောငှာ ယခု ထုတ်ပြန်ကြေညာလိုက်သည်။
ကျနော်စာပိုဒ်အဆုံး…အားလုံးကိုကြည့်လိုက်တော့…စိတ်ဝင်တစားနားထောင်နေကြတယ်…ထက်အောင်ကငြိမ်သက်နေသွားတဲ့ စကားဝိုင်းကို ထိုးဖောက်လိုက်တော့မှ-------
“ အကို မြန်မာနိုင်ငံက လည်း ကုလသမဂ္ဂအဖွဲ့ဝင်နိုင်ငံတနိုင်ငံပဲ….ဒါတွေကိုလိုက်နာဘို့ တာဝန်ရှိတာပေါ့နော်..ဒါပေမဲ့..နအဖ..စစ်အာဏာရှင်များက…ကုလသမဂ္ဂညီလာခံရောက်တုိုင်းပြောနေကြစကားရှိပါတယ်..သူတို့ဘယ်တော့မှ လူ့အခွင့်ရေးမချိုးဖောက်ပါဘူးဆိုတာလေ…ဒါတွေကို ဘယ်လိုသက်သေပြကြမလည်း…”
“ငါစောစောကပြောခဲ့သလိုပါပဲ…အပြည်ပြည်ဆိုင်ရာလူ့အခွင့်ရေးကျေညာစာတမ်းပါအချက်တွေနဲ့တိုက်ဆိုင်စစ်ဆေးကြည့်ရအောင်ပါ…..လောလောဆယ် စာတမ်းပါ အပိုဒ် ၃ နဲ့ အပိုဒ် ၅ ကိုလေ့လာစမ်းစစ်ကြည့်ရအောင်ပါ
အပိုဒ်-၃
လူတိုင်း၌ အသက်ရှင်ရန်လွတ်လပ်ခွင့်နှင့် လုံခြုံစိတ်ချခွင့် ရှိသည်။
အပိုဒ်-၅
မည်သူ့ကိုမျှ ညှင်းပန်းနှိပ်စက်ခြင်း၊ သို့တည်းမဟုတ် ရက်စက်ကြမ်းကြုတ်စွာ လူမဆန်စွာ ဂုဏ်ငယ်စေသော ဆက်ဆံမှူမပြုရ၊ သို့တည်းမဟုတ် အပြစ်ဒဏ် ပေးခြင်းမပြုရ။
ဒီအပိုဒ်လေးနှစ်ခုကိုပဲ…လေ့လာကြည့်မယ်ဆိုရင်…..စစ်အာဏာရှင်များဟာအပြည်ပြည်ဆိုင်ရာလူ့အခွင့်ရေးကြေညာ စာတမ်းပါ အချက်တွေနဲ့ဆန့်ကျင်နေတာကိုတွေ့ရလိမ့်မယ်….ဥပမာ…ပဲခူးမှာ ကျောင်းသားလေးနှစ်ယောက်ကို အပြစ်မဲ့သတ်ဖြတ်ပစ်တဲ့ကိစ္စလိုဟာမျိုး…ဒါမြင်သာတဲ့ကိစ္စမို့ပြောပြတာပါ..လူမသိသူမသိတောထဲတောင်ထဲမှာ..သတ်ဖြတ်ပစ်တဲ့သူတွေဆိုတာ နည်းလား…..သူတို့ တပ်မတော်သားအချင်းချင်းတောင်မှ…ရှေ့တန်းစစ်မျက်နှာမှာ ဒဏ်ရာရလို့ အခက်အခဲတွေကြုံနေပြီဆို..ပစ်သတ်လိုက်တဲ့အထောက်အထားတွေရှိပါတယ်…..ဘယ်မှာလည်းလူတယောက်ရဲ့လုံခြုံမူ့နဲ့ အသက်ရှင်လွတ်လပ်ခွင့်….” ကျနော့်စကားအဆုံး ချမ်းမြေ့က……
“ဟုတ်တယ်အကိုရာ…ပဲခူးမှာစစ်တပ်ကသေနပ်နဲ့ပစ်သတ်ခံလိုက်ရတဲ့..ကျောင်းသားလေးနှစ်ယောက်ကိုကြည့်ပြီး..လူတွေအတွက်လုံခြုံခွင့်ဆိုတာဘာလည်းလို့..မေးယူရမလိုဖြစ်နေပြီ…မြို့ကြီးတမြို့ရဲ့မြို့ဝင်းထဲမှာတောင်ဒီလိုလုပ်ရဲသေးရင်..လူသူသိပ်မသိနိုင်တဲ့…တောထဲတောင်ထဲတွေမှာ…ဘယ်လောက်သတ်လိုက်ဖြတ်လိုက်…ရက်စက်လိုက်ကြမလည်းဆိုတာ..မစဉ်းစားရဲဘူး…”
“နောက်တခါငါကြုံတွေ့ခဲ့ရတဲ့…စစ်ကြောရေးနဲ့ထောင်တွင်းအတွေ့အကြုံလေးတချို့လည်းဖောက်သည်ချခြင်သေးတယ်ကွ…ငါတို့ နိုင်ငံရေးလောကသားတွေထဲမှာ …ထောက်လှမ်းရေးစစ်ကြောရေးဒဏ်ကြောင့်သေကျေပျက်စီးခဲ့ရသူတွေ အများကြီးပါ…..အသက်ရှင်ပြီးလူစဉ်မမှီလူလုံးမလှဖြစ်သွားသူတွေလည်းအများကြီးပါပဲ….ဒါတွေဟာကြီးစွာသောလူ့အခွင့် ရေးချိုးဖောက်မူ့ကြီးတွေပေါ့ကွာ…ငါသူ့ငယ်ချင်းနှစ်ယောက်အကြောင်းပြောပြချင်တယ်..တယောက်က..ငါတို့နိုင်ငံရေး လောကသား..ကျောင်းသားတပ်မတော်က..ပြည်တွင်းကိုလက်နှက်တွေနဲ့ပြန်အ၀င်မှာအဖမ်းခံလိုက်ရတာ…နံမည်က.. ကိုဘိုနီအောင်တဲ့…သူ့ကိုဖမ်းပြီးစစ်ကြောရာကနေ…ဆေးထိုးလွှတ်လိုက်တယ်ကွ…အဲဒီဆေးဒဏ်ကြောင့်..ရောဂါဝေဒနာ ပြင်းပြင်းထံထံခံစားရရှာတယ်…ထောင်ချလိုက်တော့လည်းနှစ်ရှည်ထောင်ဒဏ်ကွာ…မင်းတို့စဉ်းစားကြည့်လေ..သူ့မှာအပြစ်ရှိတယ်ဆို…ထောင်ချလိုက်ပေါ့..ဘာဖြစ်လို့..လူတယောက်ဘ၀ပျက်သွားအောင်လုပ်လိုက်ရတာလည်း…ထောင်ကလွတ်လာတော့…စာရေးဆရာမ..မသန်းမြင့်အောင်ကသူ့မောင်အရင်းတယောက်ပမာပြုစုစောင့်ရှောက်ခဲ့ပါသေးတယ်..ဒါပေမဲ့ ကြာကြာမခံလိုက်ပါဘူး..ဆုံးသွားတော့တာပါပဲ…နောက်တယောက်ကစစ်တပ်ကဗိုလ်ကြီးအဆင့်ရှိတဲ့သူ…ငါ့သူငယ်ချင်း..သူကတိုင်းရင်းသားနယ်မြေတခုမှာ..တိုင်းရင်းသားလက်နှက်ကိုင်တွေရဲ့ဖမ်းဆီးခြင်းခံလိုက်ရတယ်…တိုင်းရင်းသားလက် နှက်ကိုင်အဖွဲ့အစည်းကသူ့ကိုဘာမှမလုပ်ဘူး…ဖွယ်ဖွယ်ရာရာထား..လေးလေးစားစားဆက်ဆံနဲ့ပြန်လွှတ်ပေးလိုက်တယ်…အပ်ဖျားလောက်တောင်မှ..တို့ထိခြင်းမခံခဲ့ရဘူး..အဲဒါဒီဘက်ပြန်ရောက်ပြီးလို့..စစ်ကြောရေးစခမ်းဝင်သွားပြီးပြန်ထွက်လာတော့မှ…စိတ်ဝေဒနာရသွားရှာတယ်….ရူးသွားတာပေါ့ကွာ….သူသတိလည်လာတဲ့အချိန်ဆိုအဲဒါတွေပြန်ပြောပြောပြတယ်.သူ့ကိုဆေးထိုးလွှတ်လိုက်တာဆိုတာစိတ်ဖောက်လာတဲ့အခါတိုင်းအော်အော်ပြောတယ်.သူလည်းကြာကြာမခံပါဘူး..သေသွားတယ်…”
“ သူတို့ အချင်းချင်းတောင်ညှာတာမှု့မရှိတာ တခြားသူတွေအပေါ် ကြီးစွာသောလူ့အခွင့်ရေးချိုးဖောက်ဘို့ဆိုတာ စစ်အာဏာရှင်တွေအတွက်ကတော့ ဖွဲ ဆန်ကွဲ အဆင့်လောက်ပါပဲ ” ညည်းတွားရေရွှတ်လိုက်တဲ့ စန်းမောင် စကားသံကကျနော့်ရဲ့နှလုံးသားထဲကိုထိုးဖောက်ဝင်ရောက်လာစေခဲ့တယ်…..စစ်အာဏာရှင်များဟာသူတို့ရဲ့အာဏာတည်မြဲရေးအ တွက်ဆို ဘယ်လိုသော လူ့အခွင့်ရေးကိုပဲချိုးဖောက်ရ ချိုးဖောက်ရ၀င်မလေးတတ်သူများပါ…။
အပိုဒ်-၉
မည်သူမျှဥပဒေအရမဟုတ်သော ဖမ်းဆီးခြင်းကိုဖြစ်စေ၊ချူပ်နှောင်ခြင်းကို ဖြစ်စေ၊ ပြည်နှင်ခြင်းကိုဖြစ်စေ မခံစေရ။
“ ဒီအပိုင်းမှာတော့…ချိုးဖောက်လိုက်တဲ့အခွင့်ရေး ကမ်းကုန်တယ်လို့တောင်ပြောချင်ပါတယ်……..ငါထောင်ထဲမှာတုန်းက ရဲဘော်တယောက်နဲ့ဆုံခဲ့တယ်…အခုထိတောင် သူမလွတ်သေးဘူး….သူ့နံမည်က ကိုသန်းဇော်တဲ့ သံလျှင်မြို့နယ် အမျိုးသားဒီမိုကရေစီအဖွဲ့ချုပ်က လူငယ်အဖွဲ့ဝင်တဦး … သူ့ကို…သံလျှင်ရေနံချက်စက်ရုံဗုံးပေါက်ကွဲတဲ့ကိစ္စနဲ့ပါတ်သက်ပြီး သေဒဏ်တွေ… ကျွှန်းဒဏ်တွေချထားတာ နည်းတာမဟုတ်ဘူး..တကယ်တော့သူဟာဒီအမူ့ကိစ္စမှာလုံးလုံးပါတ်သက်ဆက် နွယ်ခဲ့သူတယောက်မဟုတ်ဘူး… ..သူ့ရဲ့နိုင်ငံရေးတက်ကြွမူ့ကိုရိုက်ချိုးချင်တာနဲ့…လုပ်ကြံဇာတ်လမ်းစဉ်ပြီး…ထောင်ဒဏ်နှစ်ရှည်ချခြင်းခံလိုက်ရတာ….ဒီအမူ့ကိုကျူးလွန်ခဲ့သူကိုယ်တိုင်ကသူ့ကိုအဖမ်းခံရတော့…ကိုသန်းဇော်လုပ်တာမဟုတ်ပါဘူး..သူတို့လည်းဘာမှမသိပါဘူး…ကျနော်လုပ်တာပါလို့ ၀န်ခံတာတောင်…ကိုသန်းဇော်ကို ခုထိလွှတ်မပေးဘူးကွာ…အခုဆို ထောင်ထဲမှာ နှစ် ၂၀ ကျော်ပြီ သူနေနေရတာ…”
“ဗျာ….ဘယ်လို…ဘယ်လိုထောင်ထဲမှာနေနေရတာ..အနှစ်နှစ်ဆယ်ကျော်ပြီ..ဟုတ်လားအကို…..ဘုရား…ဘုရား…ကျနော်တို့အသက်နီးပါးလောက်တောင်မှထောင်ထဲနေနေရတာပါ့လား….ရက်စက်လိုက်တာဗျာ…” ချမ်းမြေ့ပုံစံကထိတ်ထိတ်ပြာပြာဖြစ်သွားတယ်
“သူလိုမတရားဖမ်းဆီးထောင်ချခံနေရတဲ့သူတွေအများကြီးရှိပါသေးတယ်ကွာ…..ငါတောင်မှထောင်ထဲမှာ၁၃နှစ်နီးပါးနေခဲ့ရတာ….ကိုမင်းကိုနိုင်တို့ကိုကိုကြီးတို့ဆိုငါ့ထက်တောင်များသေးတယ်..ငါမှတ်မိသေးတယ်…တခါကငါရန်ကုန်ရောက်သခိုက်နေမကောင်းဖြစ်ပါလေရော…ဒါနဲ့ဘားလမ်းမှာရှိတဲ့မွတ်စလင်ကုသိုလ်ဖြစ်ဆေးရုံမှာတက်ရောက်ဆေးကုသနေချိန်….ကိုမင်းကိုနိုင်တို့ကိုကိုကြီးတို့ငါ့ဆီရောက်လာကြတယ်…ဒီတုန်းကသူတို့ထောင်ကလွတ်လာကာစအချိန်ပေါ့….ငါတို့တွေ့ဆုံရခိုက်ကိုကိုကြီးပြောသွားတဲ့စကားလေးကငါ့ရင်ကိုတော်တော်ထိသွားတယ်ကွာ…သူကဘာပြောသလည်းဆိုတော့…ကျနော်တို့မှာ..လူငယ်ဘ၀ဆိုတာဘာမှန်းကိုမသိလိုက်ပါဘူးဗျာတဲ့…ငါလည်းအတူတူပါပဲ…ငါတို့ရဲ့လူငယ်ဘ၀တွေကိုအုတ်နံရံတွင်းမှာကုန်လွန်စေခဲ့ရတာပါ….လူငယ်ဘ၀တွေပျော်ရမဲ့အချိန်များစွာမှာငါတို့မပျော်နိုင်ခဲ့ပါဘူး…..တကယ်တော့ငါတို့ဘ၀တွေဟာလူ့အခွင့်ရေးဆိုတာတောင်းဆိုရင်း..ကိုယ့်အခွင့်ရေးတွေပေးဆပ်ခဲ့ရတဲ့ဘ၀တွေပါ….”
အားလုံးကကျနော်ပြောသွားတဲ့စကားတွေရဲ့အောက်မှာနစ်မြောသွားကြဟန်တူတယ်။ကိုယ်တိုင်မတွေ့ကြုံရပေမဲ့လို့ ရင်ထဲတွေမှာတော့ တော်တော်များခံစားသွားရသလားမသိ……..
“ ငါ စစ်အာဏာရှင်အစိုးရကို တော်တော် အသဲယားတယ်ကွ…မင်းစဉ်းစားကြည့်လေ ..လူ့အခွင့်ရေးကြေညာစာတမ်း အပိုဒ် ၂ မှာဘယ်လိုဆိုထားသလည်းဆိုတော့….
အပိုဒ်-၂
လူတိုင်းသည် လူ့အခွင့်အရေး ကြေညာစာတမ်းတွင် ဖေါ်ပြထားသည့် အခွင့်အရေးအားလုံး၊ လွတ်လပ်ခွင့်အားလုံးတို့ကိုပိုင်ဆိုင်ခံစားခွင့်ရှိသည်။လူမျိူးနွယ်အားဖြင့်ဖြစ်စေ၊အသားအရောင်အားဖြင့် ဖြစ်စေ၊ကျား ၊ မ သဘာဝအားဖြင့်ဖြစ်စေ၊ ဘာသာစကားအားဖြင့်ဖြစ်စေ၊ ကိုးကွယ်သည့် ဘာသာအားဖြင့် ဖြစ်စေ၊ နိုင်ငံရေးယူဆချက်၊ သို့တည်းမဟုတ် အခြားယူဆချက်အားဖြင့်ဖြစ်စေ၊ နိုင်ငံနှင့်ဆိုင်သော၊ သို့တည်းမဟုတ် လူမှူအဆင့်အတန်းနှင့်ဆိုင်သော ဇစ်မြစ် အားဖြင့်ဖြစ်စေ၊ ပစ္စည်းဂုဏ်အားဖြင့်ဖြစ်စေ၊ မျိူးရိုးဇာတိအားဖြင့်ဖြစ်စေ၊ အခြား အဆင့်အတန်းအားဖြင့် ဖြစ်စေ ခွဲခြားခြင်းမရှိစေရ ။ ထို့ပြင် လူတစ်ဦးတစ်ယောက် နေထိုင်ရာနိုင်ငံ၏ သို့တည်းမဟုတ် နယ်မြေဒေသ၏ နိုင်ငံရေးဆိုင်ရာ ဖြစ်စေစီရင် ပိုင်ခွင့်ဆိုင်ရာ ဖြစ်စေ တိုင်းပြည် အချင်းချင်း ဆိုင်ရာဖြစ်စေ၊ အဆင့်အတန်းတစ်ခုခုကို အခြေပြု၍သော်လည်းကောင်း၊ဒေသနယ်မြေတစ်ခုသည် အချုပ်အခြာအာဏာပိုင်လွတ်လပ်သည့်နယ်မြေ၊သို့တည်းမဟုတ်ကုလသမဂ္ဂထိန်းသိမ်းစောင့်ရှောက် ထားရသည့်နယ်မြေ၊သို့တည်းမဟုတ်ကိုယ်ပိုင်အုပ်ချူပ်ခွင့်အာဏာတို့တစိတ်တဒေသလောက်သာရရှိသည့် နယ်မြေ စသဖြင့် ယင်းသို့သော် နယ်မြေများ ဖြစ်သည်၊ ဖြစ်သည် ဟူသောအကြောင်းကို အထောက်အထားပြု၍ သော်လည်းကောင်း ခွဲခြားခြင်း လုံးဝမရှိစေရ ။
“ဒီအချက်တွေနဲ့စစ်အစိုးရလုပ်ပုံတွေနဲ့ကတော့တော်တော်ကိုဆန့်ကျင်ဘက်ပါပဲအကိုရာ…နိုင်ငံရေးလွတ်လပ်ဘို့ကိုမဆို ထားနဲ့…ဘာသာရေး..လူမူ့ရေးဘာဆိုဘာမှကိုမလွတ်လပ်တာပါ…သူတို့ကတိုင်းပြည်မှာ..စစ်ဘက်ဆိုင်ရာ..အာဏာပိုင် လူတန်းစားတရပ်ကို ထူထောင်နေတာဆိုတော့…လွတ်လပ်မူ့ဆိုတာသူတို့လူတန်းစားတွေအတွက်လောက်ပဲရှိနေမှာပါ.. ကျန်တဲ့သူတွေအတွက်ကတော့လူ့အခွင့်ရေးချိုးဖောက်ခံနေရတဲ့နင်းပြားဘ၀တွေပါပဲ…ဒါကိုမှရုန်းထွက်ဘို့မစဉ်းစားကြဘူးဆိုရင်…ဆယ်သက်ဆယ်ကမ္ဘာခံပေဦးတော့ဖြစ်နေမှာပဲအကိုရေ…ဟား..ဟား..ဟား….
စန်းမောင်ရဲ့မချိတင်ကဲရီသံရဲ့နောက်မှာမကျေနပ်သံတွေရောနှောပါနေတယ်ဆိုတာကိုအားလုံးကသတိပြုမိလိုက်ကြပါ တယ်။ ဒီနေ့တော်တော်တောင် အချိန်နှောင်းသွားပြီပဲ…
“ တို့ ဒီနေ့ဒီလောက်နဲ့ပဲနားကြရအောင်ကွာ..နောက်နေ့ လူ့အခွင့်ရေးခေါင်းစဉ်ကိုပဲဆက်ဆွေးနွေးကြတာပေါ့….။
အပိုင်း ၇ ဆက်ပါဦးမည်။
0 comments:
Post a Comment
လာရောက်လည်ပတ်ကြသော မိတ်ဆွေတို့ရဲ့အမြင်များလည်း ရေးနိုင်ပါတယ်