0 အားလုံး ကြိုးစားကြရင် အဆင့်အတန်းရှိတဲ့ မြန်မာပြည်ဖြစ်လာမှာ မလွဲပါ

အမေရိကန်သမ္မတကHillary Clinton ကို မြန်မာပြည်လွှတ်တဲ့အပေါ် အနောက်မီဒီယာများမှာတော့ အမျိုးမျိုးအဖုံအဖုံ ဝေဖန်ပြောဆိုနေကြသံတွေ ကြားရပါတယ်။ ပထမဆုံး CBS သတင်းက အမျိုးသားလုံခြုံရေး လေ့လာဆန်းစစ်သူ Juan Zarate နဲ့ Bob Orrတို့ဆွေးနွေးမှုမှာ ပထမတစ်ချက်က အမေရိကန်ရဲ့ ပူးပေါင်းဆောင်ရွက်ရေးပေါ်လစီ အောင်မြင်ကြောင်း ပြချင်တာနဲ့ ဒုတိယက တရုတ်ကို Counterလုပ်ချင်တာကြောင့်လို့ ဆိုပါတယ်။ အမေရိကန်က အာရှ-ပစိဖိတ်ဒေသမှာ တရုတ်နဲ့ကို တန်ပြန်အင်အားယှဉ်နေတာ တွေ့ရပါတယ်။ CNN သတင်းမှာတော့ တရုတ်ကိုအားစမ်းချင်လို့ မြန်မာကိုဖွင့်ပေးလိုက်တာ ကောင်းပေမယ့်လို့ မြန်မာအစိုးရက ထင်ထားတဲ့အတိုင်းမလုပ်ဘဲ .. ဒုံရင်းအတိုင်းသွားနေရင်တော့ အမေရိကန်နဲ့ ဒေါ်အောင်ဆန်းစုကြည်အပါဝင် ဒီမိုကရေစီအဖွဲ့ချုပ်ရဲ့ ပူးပေါင်းဆောင်ရွက်ရေးလမ်းစဉ်ဟာ သဲထဲရေသွန်ဖြစ်နိုင်တဲ့အကြောင်း သတိပေးထားတာကို ဖတ်ရပါတယ်။ The Washington Post မှာတော့ မြန်မာကိုဖွင့်ပေးလိုက်တာ တရုတ်ကိုအားစမ်းချင်လို့မဟုတ်ပါဘူးလို့ အမေရိကန်အရာရှိများက ငြင်းကြောင်းဖတ်ရပါတယ်။ ကျွန်တော့်အမြင်ကတော့ ဘာပဲဖြစ်ဖြစ် အမေရိကန်က ဒီလိုဖွင့်ပေးလိုက်တာကို ကြိုဆိုပါတယ်။ ဘာကြောင့်လဲဆိုရင် -

၁. မြန်မာ့လက်ရှိအစိုးရရဲ့ ပြောင်းလဲလက်စအရှိန်အဟုန်ကို မြှင့်တင်ပေးနိုင်ခြင်း၊

၂. နိုင်ငံရေးအကျဉ်းသားကိစ္စ၊ အမျိုးသားရင်ကြားစေ့ရေးကိစ္စ အစရှိတာတွေကို အနီးကပ်ဝေဖန်တိုက်တွန်းနိုင်ခြင်း၊

၃. လွှမ်းမိုးလာတဲ့ တရုတ်နိုင်ငံရဲ့ နိုင်ငံရေးနဲ့စီးပွားရေး ကဏ္ဍတွေကို Counter လုပ်ပြီး ချိန်ညှိနိုင်ခြင်း (တရုတ်ရင်းနှီးမြှုပ်နှံမှုများကို မနှစ်သက်၍မဟုတ်၊ ပြိုင်ဘက်ကိုဖိတ်ခေါ်ခြင်းဖြင့် လက်ဝါးကြီးအုပ်ခေါင်းပုံဖြတ်မှုကို ကာကွယ်ရန်အတွက်)။

နောက်တစ်ခုက နိုင်ငံရေးမှာ အခုလိုအသွင်ပြောင်းစ ပြုလာပေမယ့် စီးပွားရေးမှာ အသွင်ပြောင်းဖို့ အများကြီးလိုနေသေးတဲ့ ကိစ္စပါ။ ဥပမာ - BBCက Rachel Harvey ရဲ့ဆွေးနွေးမှုမှာ မြန်မာပြည်က နိုင်ငံခြားနည်းပညာအကူအညီ အရမ်းလိုအပ်နေပါတယ်။ exchange rate တစ်သမတ်တည်းဖြစ်ဖို့၊ ရင်းနှီးမြှုပ်နှံမှုဆိုင်ရာ တရားဥပဒေတွေကို ထင်သာမြင်သာနဲ့ ခိုင်မာအောင်ပြဌါန်းဖို့ .. အစရှိသဖြင့် လုပ်ဖို့အများကြီးလိုပါတယ်။ ဒါတွေအရင်မလုပ်သေးဘဲနဲ့ဆိုရင် ဆန်ရှင်သိမ်းလိုက်ရင်တောင် အိမ်နီးချင်းနဲ့ ဂျပန်အစရှိတဲ့ အာရှနိုင်ငံတစ်ချို့ကလွဲရင် ဘယ်သူကမှ လာရောက်ရင်းနှီးမြှုပ်နှံချင်မှာမဟုတ်ပါဘူး။ နောက်တစ်ခါ The New York Times မှာ ဦးသန့်မြင့်ဦးဆွေးနွေးထားသလို .. banking system နဲ့ financial sector မှာလုပ်ရမှာတွေ အများကြီးရှိနေပါသေးတယ်။Macquarie တက္ကသိုလ်က ပါမောက္ခ Sean Turnell ဝေဖန်ထားသလို မြန်မာဘဏ်များက လုပ်ငန်းရှင်များကို နှစ်ရှည်ချေးငွေထုတ်ပေးဖို့လည်း လိုအပ်နေတယ် လို့ မြင်ပါတယ်။ သူ့အဆိုအရ မြန်မာပြည်က အတိုးပေးစားသူတွေဟာ တစ်နှစ်ကို အတိုးနှုန်း ၁၈၀ % ယူလေ့ရှိတယ်လို့သိရပါတယ်။ ဒါတွေက အောက်ခြေလူတန်းစားတွေ ပိုပြီးဆင်းရဲမွဲတေစေမယ့် စံနစ်တွေလို့ ကျွန်တော်မြင်ပါတယ်။ နောက်ပြီး အစိုးရမှာ နိုင်ငံတော်ဘတ်ဂျက်၊ အသုံးပြုငွေ အစရှိတာတွေကို ထင်သာမြင်သာ၊ မှန်မှန်ကန်ကန်နဲ့ ပြည်သူကိုချပြဖို့ အင်မတန်အရေးကြီးပါတယ်။

နောက်ဆုံးအနေနဲ့ သတင်းတွေမှာတွေ့နေရတာက မြန်မာပြည်ရဲ့မြို့တော် နေပြည်တော် အပေါ်ဝေဖန်သုံးသပ်ထားမှုတွေပါ။ ၂၀၁၄ မှာ အာဆီယံဥက္ကဌ လုပ်ဖို့လည်း တာဝန်ယူထားပြီဆိုတော့ ဘာပဲပြောပြော ဧည့်သည်တော်တွေကို ဆွဲဆောင်ဖို့နဲ့ ကိုယ်တိုင်အတွေ့အကြုံရဖို့ infrastructure ပိုင်းမှာ လူကြည့်ကောင်းအောင် ဖြစ်နေဖို့လိုပါတယ်။ လောလောဆယ် NPR သတင်းနဲ့ The Wall Street Journal သတင်းထောက်တို့ရဲ့ သုံးသပ်ထားပုံတွေကို ဖတ်နေရပါတယ်။ လောလောဆယ် လူမရှိသေးတာက ပူစရာမလိုပါဘူး .. အိမ်သာရင်ဧည့်လာမှာပါ။ အရေးအကြီးဆုံးတွေထဲက အရေးအကြီးဆုံးတစ်ခုကို ပြောရရင် စီးပွားရေးအတွက် ပေါ်လစီပြောင်းပေးတာ ဘာညာက .. အစိုးရကိစ္စဖြစ်လို့ ထားပါတော့။ ကျွန်တော်တို့ အခုလောလောဆယ် ပြည်သူတစ်ယောက်အနေနဲ့ ကြိုဆင်ပြင်ဆင်ထားရမှာက အင်္ဂလိပ်စာအားကောင်းဖို့ပါ။ အဲဒါ အလွန်အရေးကြီးပါတယ်။ ကျွန်တော်အပါဝင် ကျွန်တော်သိသလောက် မြန်မာအများစုက အင်္ဂလိပ်စာ ကျွမ်းကျင်မှုသိပ်မရှိကြသေးပါဘူး။ နိုင်ငံခြားနဲ့ ဆက်ဆံရတော့မယ်ဆိုရင် ဒါကလုံးဝ မတတ်မဖြစ် တတ်ထားရမှာပါ။ နောက်ပြီး .. ဒါက ကျွန်တော်တို့ ပြည်သူတွေ ကိုယ့်ဟာကိုယ် လုပ်နိုင်တဲ့ကိစ္စပါ။

လောလောဆယ်တော့ တတ်သမျှမှတ်သမျှလေးနဲ့ ငပိသံပါပါပြောနေကြတာ သတင်းတွေထဲမှာ အမြဲကြားနေရပါတယ်။ သို့ပေမယ့် မကျွမ်းကျင်သူအချင်းချင်းမှာ စင်္ကာပူလို အိုကေလား .. no have lah ပုံစံမျိုးနဲ့ပြောနေတာမဟုတ်ဘဲ ကိုယ်သိသလောက်လေးနဲ့ grammar ကျအောင် ကြိုးစားပြောနေကြတာတွေ့လို့ အားတော့ရမိပါတယ်။ ဘာပဲပြောပြော စင်္ကာပူလို တောင်မကျမြောက်မကျတော့ မြန်မာနိုင်ငံကို မဖြစ်စေလိုပါ။ ကျွန်တော်တို့အားလုံး ကြိုးစားကြရင် အဆင့်အတန်းရှိတဲ့ မြန်မာပြည်ဖြစ်လာမှ မလွဲပါ။

မောင်သစ်စိမ်း(MMCP)