မြန်မာနိုင်ငံတိုးတက်စေရန်အတွက် ပညာရေးကို မြင့်တင်ရမည်ဖြစ်ကြောင်း ဒေါ်အောင်ဆန်းစုကြည်က ၂၀၁၁ခုနှစ် နိုဝင်ဘာလ ၂၀ ရက်နေ့တွင် အမျိုးသားဒီမိုကရေစီအဖွဲ့ချုပ်ရုံး၌ကျင်းပသော ၉၁ နှစ်မြောက် အမျိုးသားအောင်ပွဲနေ့ အခမ်းအနားတွင် ပြောကြားသွားသည်။
`လူတိုင်းမှာ ကိုယ်ပိုပြီးတော့ စိတ်ဝင်စားတဲ့ကဏ္ဍတွေကို မီးမောင်းထိုးတာတွေရှိကျပါတယ်။ အဲတော့ ကျမက ပညာရေးနဲ့ နိုင်ငံရေးဆက်စပ်မှုကိုပဲ မီးမောင်းထိုးပြီးတော့ ပြောချင်ပါတယ်။ အခု ၂၀၁၁ ခုနှစ်မှာလဲ ကျမတို့နိုင်ငံတိုးတက်ဖို့ဆိုလို့ရှိရင် ကျမတို့နိုင်ငံရဲ့ ပညာရေးကိုမြင့်တင်ရမယ်။ ပညာရေးကို မြှင့်တင်ရမယ်ဆိုတာ ဘွဲ့ရတွေအများကြီးမွေးထုတ်ပေးရုံနဲ့ မပြီးပါဘူး။ ရတဲ့ဘွဲ့တွေဟာ အနှစ်သာရရှိရပါမယ်။ ဘွဲ့ရလာတဲ့ လူငယ်လေးတွေဟာလည်း တကယ့်ပညာတတ်လူငယ်လေးတွေ ဖြစ်ရပါမယ် ´ဟု ဒေါ်အောင်ဆန်းစုကြည်က အဆိုပါအခမ်းအနားတွင် ပြောကြားခဲ့သည်။
တိုင်းပြည်ဖွံ့ဖြိုးတိုးတက်စေရန် ပညာအဆင့်အတန်းမြင့်အောင် ပြုလုပ်ရမည်ဖြစ်ကြောင်း နှင့် နိုင်ငံတစ်နိုင်ငံ၏အရေးကိုကြည့်မည်ဆိုပါက ၎င်းနိုင်ငံ၏ ပညာရေးကို အဓိကထား၍ ကြည့်ရမည်ဖြစ်ကြောင်း ကို ဒေါ်အောင်ဆန်းစုကြည်ကပြောကြားသွားခဲ့သည်။
(၉၁)နှစ်မြောက် အမျိုးသားအောင်ပွဲနေ့ အခမ်းအနားကို ရွှေဂုံတိုင်ရှိ အမျိုးသားဒီမိုကရေစီအဖွဲ့ချုပ်ရုံး၌ နံနက်(၁၀)နာရီမှ စတင်၍ အခမ်းအနား အစီအစဉ်(၈)ရပ်ဖြင့် ကျင်းပခဲ့ခြင်းဖြစ်သည်။
`အမျိုးသားအောင်ပွဲနေ့ဟာ ဘာဖြစ်လို့ဖြစ်လာလဲဆိုတဲ့ ဇစ်မြစ်ကိုကြည့်လိုက်တဲ့အခါမှာ အမျိုးသားစိတ်ဓာတ်ကြောင့်ဖြစ်လာတယ်လို့ ဒီလိုပဲ ကျမတို့ပြောရမှာပဲ ´ဟု ဒေါ်အောင်ဆန်းစုကြည်က ပြောသည်။
၁၉၂၀ခုနှစ် ရန်ကုန်တက္ကသိုလ်အက်ဥပဒေ ပြဌာန်းချက်များကို လက်မခံနိုင်ခြင်းကြောင့် တက္ကသိုလ်ကျောင်းသားထုကြီး ပေါ်ပေါက်လာခြင်း အမျိုးသားကျောင်းများပေါ်ထွန်းလာခဲ့ခြင်း ကိုလိုနီအစိုးရက မြန်မာတိုင်းသူပြည်သားများအား အသပြာပညာရပ်များ သင်ယူခွင့်မရရှိရေးနှင့် အကြားမြင်ဗဟုသုတ နည်းပါးစေခြင်းတို့ဖြင့် ကိုလိုနီစနစ် သက်တမ်းရှည်ကြာအောင်ဖန်တီးခဲ့ခြင်းတို့ကြောင့် အမျိုးသားအောင်ပွဲနေ့ ပေါ်ပေါက်လာခဲ့ရခြင်းဖြစ်ကြောင်းကို အမျိုးသားဒီမိုကရေစီအဖွဲ့ချုပ်မှ ဒုတိယ ဥက္ကဌဦးတင်ဦးမှ ရှင်းပြခဲ့သည်။
အဆိုပါ (၉၁)နှစ်မြောက် အမျိုးသားနေ့အောင်ပွဲ အခမ်းအနားသို့ နိုင်ငံရေးပါတီဝင်များ၊ နိုင်ငံရေးကို စိတ်ပါဝင်စားသူများ၊ ပြည်တွင်း/ပြည်ပ သတင်းထောက်များ အပါအ၀င် လာရောက်ကြည့်ရှုအားပေးသူ ပြည်သူပေါင်း ငါးရာ(၅၀၀) ကျော်ဝန်းကျင်ခန့်ရှိကြောင်း သိရသည်။
Myit Makha Mediagroup
0 comments:
Post a Comment
လာရောက်လည်ပတ်ကြသော မိတ်ဆွေတို့ရဲ့အမြင်များလည်း ရေးနိုင်ပါတယ်