ဖြစ်စဉ်နှင့် ပတ်သက်၍ ဖော်ပြထားသည့် သတင်းဆောင်းပါး - (၅)နှစ်အရွယ် မိန်းကလေးအား မတရားပြုကျင့်ခဲ့သည့် အမှုဖြစ်စဉ်၌ မော်လမြိုင်ခရိုင် ဒုတိယ တရားသူကြီးမှ တရားခံအား တရားသေ လွတ်ပေးခဲ့မှုနှင့် ပတ်သက်၍ ဝိုင်းဝန်းကူညီ အမှုမှန်ဖော်ထုတ်ပေးပါရန် (တိုင်ကြားစာ)-ဒီမိုဝေယံ
စွပ်စွဲချက်တွေနဲ့ အမှုဖြစ်ပြီးနောက်ပိုင်း လူသိထင်ရှား တရားဝင် လုပ်ဆောင်ချက်တွေအရ ၅ နှစ်အရွယ် ကလေးမလေးဟာ မုဒိန်းကျင့်ခံခဲ့ရတာ အလွန်ပဲ သိသာထင်ရှားလှပါတယ်။ ဒီကိစ္စဟာ လုပ်ကြံဖန်တီးပြီး အမှုဖွင့် အရေးယူစေတာ မဟုတ်မှန်း လူတိုင်းကတောင် သာမန်အားဖြင့် စဉ်းစားဆင်ခြင်နိုင်ကြပါလိမ့်တယ်။
ဒါကို ပုဒ်မ ၃၇၆ အရ ပြစ်မှုကျူးလွန်ကြောင်း မထင်ရှားလို့ တရားသေ လွှတ်လိုက်တယ်ဆိုတော့ ကာယကံရှင် ဘက်ကရော တရားဥပဒေနဲ့ တရားမျှတမှုကို လေးစား တန်ဖိုးထားသူတွေကရော အတော့်ကို မကျေနပ် ဖြစ်ကြမှာပါပဲ။ မကျေနပ်ဖြစ်စရာ ကောင်းလှတဲ့အပြင် မြန်မာ့တရားစီရင်ရေးရဲ့ တန်ဖိုးနဲ့ ပြည်သူတွေ လေးစားယုံကြည် အားကိုးထိုက်တဲ့ အခြေအနေကိုလည်း ထိခိုက်သွားစေနိုင်တယ်လို့ ဆိုရမှာ ဖြစ်ပါတယ်။
မြန်မာနိုင်ငံမှာ လက်ရှိအချိန်ထိ အဂတိလိုက်စားတာတွေဟာ ဆိုးဆိုးဝါးဝါး ပြောင်ပြောင်တင်းတင်း ဖြစ်ပျက်နေတုန်းပဲ ဆိုတာကို ငြင်းလို့ မရသေးပါဘူး။ ဒါဟာ ကိုယ်ကျိုးရှာ မသမာသူတွေအတွက် အခွင့်ကောင်းယူဖို့ သိပ်ကောင်းတဲ့ အခြေအနေဖြစ်ပါတယ်။ အမှုတခုမှာ တရားတာ၊ မတရားတာ အပထား.. အမှုနိုင်ဖို့ကိုသာ ဦးတည်လုပ်ဆောင်ဖို့ တရားမဲ့ ဥပဒေမဲ့ လုပ်ဆောင်ချင်သူတွေအတွက်လည်း အခွင့်ကောင်း ဖြစ်နေပါတယ်။ မြန်မာ့တရားစီရင်ရေးမဏ္ဍိုင် ပျက်စီးစေဖို့၊ သိက္ခာကျစေဖို့ အဓိက အကြောင်းရင်းကြီးလည်း ဖြစ်နေပါတယ်။ အဂတိ လိုက်စားတာတွေ၊ မတရားတာတွေ၊ ဥပဒေမဲ့တာတွေကို အားပေးရင် အမှိုက်ကစ ပြဿဒ် မီးလောင်သလို တိုင်းပြည်တခုလုံး ပျက်စီးသွားနိုင်ပါတယ်။
အထက်က သတင်းဆောင်းပါးမှာ ခိုင်လုံတဲ့ သတင်းရပ်ကွက်အဆိုအရ စွပ်စွဲခံရသူဘက်က တရားသူကြီးကို လာဘ်ထိုးတယ် ဆိုတာ ဖြစ်နိုင်သလို သက်သေခံ ဖျက်ဆီးတာမျိုးကလည်း ဖြစ်နိုင်ပါတယ်။ ဒါကြောင့် အမှုမနိုင်ရခြင်း အကြောင်းရင်းတွေကို စုံစမ်းဖော်ထုတ်ပြီး လိုအပ်သလို ဆက်လက် ဆောင်ရွက်သင့်ပါတယ်။
တရားသူကြီးက ဒီစီရင်ချက်ကို ချမှတ်ရတဲ့ အကြောင်းပြချက်တွေကို ခိုင်လုံအောင် တင်ပြပြီးမှ တရားရုံးအမိန့်ကို ထုတ်ပြန်ပေးရပါတယ်။ အဲဒီအကြောင်းပြချက်တွေနဲ့ စီရင်ချက်ကို တရားလိုဘက်က မကျေနပ်ရင် အထက်တရားရုံးမှာ အယူခံဝင်နိုင်ခွင့် ရှိပါသေးတယ်။ တရားလိုဘက်က ကာယကံရှင်တွေဟာ ဥပဒေရေးရာကို မသိနားမလည်တဲ့ ရိုးသားသူတွေ ဖြစ်ပုံရတဲ့အတွက် သူတို့ကို နားလည် တတ်ကျွမ်းသူတွေ၊ တရားရုံးစရိတ် တတ်နိုင်သူတွေက ဝိုင်းဝန်းကူညီပေးဖို့ လိုအပ်ပါမယ်။
တရားသူကြီးအနေနဲ့ မှုခင်းပါ ကြားနာချက်နဲ့ သက်သေခံ အထောက်အထားတွေအရသာ ဆုံးဖြတ်စီရင်ခြင်းဟာ လုံလောက်မှု မရှိပါဘူး။ ကျောသားရင်သား မခွဲခြားဘဲ တရားဥပဒေ အမှန်တကယ် ထွန်းကားနိုင်ရေးကို အားပေးတဲ့ ပကတိ ဥာဏ်အမြော်အမြင် ဆင်ခြင်တုံတရားနဲ့ ဆုံးဖြတ် စီရင်တာမျိုး ဖြစ်စေလိုပါတယ်။
မုဒိန်းကျင့်ခံရတဲ့ ၅ နှစ်အရွယ် မိန်းခလေးမှာ နိုင်ငံသားတဦးရဲ့ ရပိုင်ခွင့်နဲ့ တရားဥပဒေရဲ့ ကာကွယ် စောင့်ရှောက်ခွင့်ကို အပြည့်အဝ ခံစားထိုက်ပါတယ်။ ဒါကြောင့် အမှုမှန် ပေါ်ပေါက်လာဖို့ကို အားပေးကြရပါမယ်။
ဒီကိစ္စမျိုးဟာ နောက်နောင် အလားတူ မဖြစ်ရစေရဖို့က နောက်ထပ် အရေးကြီးတဲ့ကိစ္စ ဖြစ်ပါတယ်။ အခု အမှုမှာ ကျူးလွန်တယ်လို့ စွပ်စွဲခံရတဲ့ ဦးခွေးဟာ တကယ်ကို ကျူးလွန်ခဲ့တယ်ဆိုရင် ဒီလူဟာ အခြားလူတွေကို အချိန်မရွေး နောက်ထပ် အန္တရာယ်ပြုနိုင်တဲ့ အခြေအနေမှာ ရှိနေပါပြီ။ ဒီလို ဖြစ်လာနိုင်စရာရှိတဲ့ အန္တရာယ်ကို ကြိုတင်ကာကွယ်ဖို့၊ တားဆီးနိုင်ဖို့အတွက် အရပ်ဖက် ပြည်သူတွေမှာရော၊ ပြည်သူ့လုံခြုံရေးအတွက် တာဝန်ရှိ ရဲတွေမှာလည်း မလိုအပ်ဘဲ ဝန်ထိုပ်ဝန်ပိုးတခု ဖြစ်လာနိုင်စရာ ရှိနေပါတယ်။
ထပ်ပြီးတော့ ပြောပါရစေ။ ဒီကိစ္စမှာ အမှုမှန် ဖေါ်ထုတ်နိုင်ဖို့ တရားဥပဒေ မြတ်နိုးသူတွေက ဝိုင်းဝန်း ကြိုးပမ်းပေးသင့်ပါတယ်။ ဒီအမှုမှာကိုပဲ ထပ်ပြီး အယူခံဝင်ရပါမယ်။ ဒီအမှုအကြောင်းကိုလည်း လူထုအကြား ကျယ်ကျယ်ပြန့်ပြန့် သိအောင် နှိုးဆော်ပေးကြရပါမယ်။ တရားဥပဒေ အမှန်တကယ် စိုးမိုးရေးအတွက် အစိုးရအသီးသီးနဲ့တကွ ဥပဒေဘက်တော်သားတွေ အပါအဝင် လူထုတရပ်လုံးက တက်တက်ကြွကြွ ဝိုင်းဝန်း တည်ဆောက်ဖို့ သိပ်လိုအပ်နေပါပြီ။
လွင်အောင်စိုး
၁၉-၅-၂ဝ၁၂
1 year ago
0 comments:
Post a Comment
လာရောက်လည်ပတ်ကြသော မိတ်ဆွေတို့ရဲ့အမြင်များလည်း ရေးနိုင်ပါတယ်