ကြွေလွင့်သွားသော ခွပ်ဒေါင်းတို့ရဲ့အရှင်သခင်
၅.၈.၂၀၁၁ ရက်နေ့ မွန်းလွဲ (၁၂း၃၀) နာရီတွင် ရွှေဗဟိုဆေးရုံ၌ မြန်မာ့ပန်းချီလောက၊ စာနယ်ဇင်းပန်းချီလောက၏ ထွန်းလင်းတောက်ပနေသော နေတစ်ဆင်းဖြစ်သူ ပန်းချီ မောင်မောင် သိုက် အသက် (၆၆)နှစ်သည် ကြွေလွင့်သွားရှာပြီဖြစ်သည်။
ဆရာ မောင်မောင်သိုက်၏ ဈာပနအခမ်းအနားအား ၇.၈.၂၀၁၁ ရက်နေ့ ညနေ (၄း၀၀) နာရီ အချိန်တွင် ရေဝေးသုဿန်တွင် မီးသင်္ဂြိုလ်ခြင်း အခမ်းအနားကို ကျင်းပခဲ့ရာ နာရေးကူညီမှုအသင်း (ရန်ကုန်)မှ ဦးစီးဦးဆောင်ကာ စာပေပညာရှင်များ၊ ပန်းချီပညာရှင်များနှင့် ဆရာမောင်မောင်သိုက် အား လေးစားချစ်ခင်ကြည်ညိုကြသည့် ဧည့်ပရိသတ်ပေါင်းများစွာဖြင့် စည်ကားသိုက်မြိုက်စွာ ကျင်းပ ခဲ့သည်။
ပန်းချီမောင်မောင်သိုက်၏ အနုပညာစွမ်းအားများသည် ဘာသာသာသနာအတွက်၎င်း၊ မျိုးချစ် စိတ်ဓါတ် ရှင်သန်ထက်မြတ်ရေးအတွက်၎င်း၊ အနုအလှ ခံစားသူတို့အတွက်၎င်း စိုးမိုးလွှမ်းခြုံခြင်းကို ခံရမည်ဖြစ်သည်။ ထို့အပြင် တစ်ခုတည်းသော အမျိုးသားပါတီနိုင်ငံရေး အဖွဲ့အစည်း၏ အလံတော် ခွပ်ဒေါင်းနှင့် ကြယ်တို့၏ အရှင်သခင်ဖြစ်ခဲ့သည်ကို အများသူငှါ သိနိုင်တော့မည် မဟုတ်ချေ။
ဆရာသိုက် ရောက်ရှိရာ မြင့်မြတ်သော ဘုံဋ္ဌာနမှ မြန်မာတစ်မျိုးသားလုံးအတွက် ငြိမ်းချမ်းလှပ သာယာစိုပြေသော ပန်းချီကားချပ် ရေးဆွဲနိုင်ပါစေဟု ဆန္ဒပြုရင်းနှင့် . . .
ဆရာပါတုန်းက တစ်ကြိမ် “မောင်ကျော်သူ မင်းအကြောင်း ရေးဦးမယ်” တဲ့
အခု ဆရာသိုက်က တစ်ကြိမ် “ကိုကျော်သူ ခင်ဗျားပုံတူ ဆွဲဦးမယ်” တဲ့
ခုတော့ ကိုယ့်ပုံကိုယ်ဆွဲ ကိုယ့်သမိုင်းကိုယ်ရေးယုံပေါ့ ဆရာတို့ရယ် . . . . ။
ကျော်သူ
0 comments:
Post a Comment
လာရောက်လည်ပတ်ကြသော မိတ်ဆွေတို့ရဲ့အမြင်များလည်း ရေးနိုင်ပါတယ်