ပြည်သူ့ခေတ် အတွဲ(၃) အမှတ်(၁၂၁) မှာ ဆရာမောင်ဝံသရဲ့ကော်လံကို ဖတ်မိလိုက်ပြီး တွေးစရာလေးတွေ ပေါ်လာလို့ပါ။
ဆရာက အများပြည်သူသိအောင် သတင်းစာက ထုတ်ပြန်ပေးလိုက်တဲ့ ဆက်သွယ်ရေးဥပဒေကြမ်း အကြောင်း ရေးထားတာဖတ်လိုက်ရပါတယ်။ ဆရာက အများပြည်သူသိအောင် သတင်းစာက ထုတ်ပြန်လိုက်တယ်ဆိုပေမယ့် အဲဒီအများပြည်သူထဲမှာ သတင်းစာမဖတ်တဲ့ ကျနော့်လိုပြည်သူတယောက်အဖို့ ဆရာတို့ရေးမှပဲ သိခွင့်ရလိုက်လို့ ကျေးဇူးအထူးတင်ပါတယ်ဆရာ။
ဆရာရေးပြထားတဲ့ ဥပဒေကြမ်းထဲက အကြောင်းအရာတွေကို သိလိုက်ရတော့ ဒီနေ့ ဒီမိုကရေစီ သွားနေပါတယ်ဆိုတဲ့ အချက်ဟာ ယုံကြည်စရာကောင်းလောက်တယ်လို့ ကျနော်တော့ မထင်မိဘူးဗျ။
အဲဒီဥပဒေကြမ်းထဲက အချက်အလက်တွေဟာ အရင် စစ်အစိုးရလက်ထက်က တစ်ဖက်သတ် ထုတ်ပြန်ထားခဲ့တဲ့ အချက်တွေ ပြန်လည်ပါဝင်နေတာတွေ့နေရတာက အဓိကအချက်ပါ။ ဒီနေ့ခေတ်လို အိုင်တီ နည်းပညာခေတ်ကြီးထဲမှာ ခေတ်မမှီတော့တဲ့ အတွေးအခေါ်တွေကို လက်မလွှတ်ဘဲ ဥပဒေကို
သားရေကွင်းလို လိုတိုးပိုလျှော့ လုပ်ချင်ရာလုပ်မယ်ဆိုတဲ့ နောက်ပြန်ဆွဲ အာဏာရူးစိတ်ဓာတ်များနဲ့ ရေးသားလိုက်တဲ့ ဒီဥပဒေကြမ်းကြီးကို အာဏာရှင်လက်ကိုင်တုတ်ကိုယ်စားလှယ်အများစုနဲ့ ရွေးခန့် စစ်တပ်ကိုယ်စားလှယ်တွေ ကြီးစိုးထားတဲ့ လွှတ်တော်ကြီးက အတည်ပြုဖို့များပါတယ်။ ဘယ့်နှယ်ဗျာ အီးမေးလ်တစ်စောင် ထောင်၁၅နှစ် ချလို့ရတယ်ဆိုတဲ့ ဥပဒေကြီးက တကမ္ဘာလုံးမှာ မြန်မာနိုင်ငံတနိုင်ငံတည်း ဟာသတွေ လုပ်နေသလို ဖြစ်မနေဘူးလား။ ၂၁ရာစုရဲ့ အကောင်းဆုံးဟာသဖြစ်နေမယ် ထင်ပါတယ်။ အီးမေးလ်ဆိုတဲ့သဘောကိုတောင် ဒီဥပဒေရေးတဲ့ ပုဂ္ဂိုလ်ထီး ပုဂ္ဂိုလ်မတွေ နားမလည်တာလား မေးရမလို ဖြစ်နေပါပြီ။
မနေ့တနေ့ကလာတဲ့ အမေရိကန်သမ္မတက ဒီမိုကရေစီလမ်းကို လျှောက်လှမ်းစပြုလာတဲ့ မြန်မာနိုင်ငံကို အားပေးထောက်ခံဖို့ လာတယ်လို့ ဆိုပါတယ်။ တကယ်တော့ ဦးသိန်းစိန်အစိုးရအဖွဲ့ထဲမှာ ခေတ်ဟောင်းကိုတမ်းတ အာဏာစည်းစိမ်လက်မလွှတ်ချင်တဲ့ ငါးခုံးမတွေ တလှေလုံးအပြည့်ပါ။
ဘယ်နေ့ဘယ်ကာလအထိ အယောင်ဆောင်နေကြမလဲဆိုတာ စိတ်ဝင်စားဖို့ကောင်းပါတယ်။
နောက်တစ်ချက်က အိုဘားမားလာခါနီးလေးမှာ ဖိအားတချို့လျော့အောင် နိုင်ငံရေးအကျဉ်းသားတွေကို တက်သုတ်ရိုက်လွှတ်လိုက်ပါတယ်။ တကယ်တော့ ဒီမိုကရေစီသွားတယ်ဆိုရင် ဒီနိုင်ငံရေးအကျဉ်းသားတွေကလည်း ဒီမိုကရေစီအရေး လုပ်ခဲ့ကြတဲ့သူတွေဖြစ်တာကြောင့် ဆက်လက်ထိန်းချုပ်ထားဖို့ လုံးဝမသင့်တော့တာပါ။ ဒီနေ့ ဒီမိုကရေစီလမ်းကြောင်းကိုမရောက်ရောက်အောင် တွန်းအားပေးခဲ့သူတွေဟာ ဒီနိုင်ငံရေးအကျဉ်းကျခံ သူရဲကောင်းတွေပါ။ တချိန်က မတရားတဲ့ ဥပဒေတွေ၊ မမှန်ကန်တဲ့ လုပ်နည်းလုပ်ဟန်တွေကြောင့် အသက်ကိုပါ စတေးသွားခဲ့ရသူတွေ မနည်းပါဘူး။ ဦးသိန်းစိန်အစိုးရဟာ တကယ့် ဒီမိုကရေစီအစိုးရဆိုရင် ဒီလူတွေကို တောင်းပန်စကားပြောရမှာပါ။ သူတို့တွေရဲ့ လူမှုဒုက္ခတွေကို ကူညီထောက်ပံ့ပေးရမှာပါ။ အရင်စစ်အုပ်စုရဲ့ လုပ်ရပ်တွေအတွက် လိပ်ပြာသန့်တယ်ဆိုရင် လုပ်ကိုလုပ်သင့်တာတွေပါ။
ဒါပေမဲ့ ဒီအုပ်စုထဲမှာ ထိပ်ပိုင်းက ပါခဲ့ဘူးတဲ့ သမ္မတကြီးက ဒီမိုကရေစီ လမ်းကြောင်းကို စစ်တပ်က အနှစ်(၂၀)ကျော် ကြာအောင်ပုံသွင်းပျိုးထောင်ပေးခဲ့ရပါတယ် ဆိုတဲ့စကားဟာ အကြိမ်ကြိမ် အသက်စွန့်ကြိုးပမ်းခဲ့တဲ့ လူထုမျှော်လင့်ချက်တွေကို ရိုက်ချိုးဖျက်ဆီးသလိုဖြစ်ခဲ့ရပါတယ်။
သမ္မတကြီးရဲ့နောက်ပြန်မလှည့်ဘူးဆိုတဲ့စကားဟာ တကမ္ဘာလုံးကို အယုံသွင်းနေသလားလို့ ထင်ရလောက်အောင် အစိုးရအဖွဲ့ဟာ (အစိုးရအဖွဲ့ဆိုတဲ့နေရာမှာ အာဏာသုံးရပ်ခွဲဝေအုပ်ချုပ်နေပါတယ်ဆိုတဲ့ ဥပဒေပြုအဖွဲ့၊ တရားစီရင်ရေးအဖွဲ့၊ အုပ်ချုပ်ရေးအဖွဲ့အားလုံးပါဝင်ပါတယ်) အပြောတမျိုး အလုပ်တမျိုးတွေ ဖြစ်နေတာပါ။ အမေရိကန်အပါအဝင် ကျနော်တို့ ပြည်သူတွေအထိ မျက်စိမလည်မိဖို့ဘဲ လိုပါတယ်။ ကျနော်တို့ လူမျိုးတွေကလည်း အရမ်းအယုံလွယ်ကြပါတယ်။ ကိုယ့်ကိုလိမ်နေရင်တောင် လိမ်နေတဲ့သူကို အပြစ်မတင်ရက်ကြဘူး။ ကိုယ်ညံ့လို့ပါလို့ ဆိုတာမျိုး ခံယူတတ်ကြတာ များတဲ့အတွက် ဒီလူတွေ ဆက်လိမ်နေကြမှာကိုတော့ စိုးရိမ်မိတယ်ဗျာ။
yelynn80
0 comments:
Post a Comment
လာရောက်လည်ပတ်ကြသော မိတ်ဆွေတို့ရဲ့အမြင်များလည်း ရေးနိုင်ပါတယ်