နေပြည်တော် ၊ ဇူလိုင် ၁၆
မြန်မာနိုင်ငံ အပေါ် ချမှတ်ထားသော စီးပွားရေး ပိတ်ဆို့မှုများ ရုပ်သိမ်း ရေး ကိစ္စရပ်နှင့် ပတ်သက်၍ အမျိုးသား ဒီမိုကရေစီအဖွဲ့ချုပ်သဘောထားကိုသီးခြားထုတ်ပြန် ပေးသွားမည်ဟုပါတီဥက္ကဌ ဒေါ်အောင်ဆန်းစုကြည်က ပြည်ထောင်စု လွှတ်တော် အစည်းအဝေး ခေတ္တ ရပ်နားချိန်တွင် သတင်းမီဒီယာများ၏ မေးမြန်းမှုကို ဖြေကြားခဲ့သည်။
ဇူလိုင်လ ၁၃ ရက်နေ့တွင် ပြုလုပ်ခဲ့သော ပြည်သူ့လွှတ်တော် အစည်းအဝေး တွင် အရေးကြီး အဆို အဖြစ် ရှမ်းတိုင်းရင်းသားများ ဒီမိုကရက်တစ် ပါတီမှ ဒေါ်နန်းဝါနုက စီးပွားရေး ပိတ်ဆို့မှုများ ရုပ်သိမ်းနိုင်ရေးအတွက် လွှတ်တော်နှင့် ဆောင်ရွက်နိုင်သူ မည်သူ့ကို မဆို မည်သည့် နည်းလမ်းကို မဆို အသုံးပြု ၍ ဖြစ်စေ ညှိုနှိုင်း ဆောင်ရွက်ရန် တိုက်တွန်းကြောင်း အဆိုကို တင်သွင်းခဲ့ရာ ပြည်သူ့လွှတ်တော် ကိုယ်စားလှယ်များ အကြား မိုက်(Microphone)လု၍ ဆွေးနွေး ခဲ့ရသည် အထိ အခြေအတင် ဖြစ်ပွားခဲ့ရသည်။
ပြည်ထောင်စု အစိုးရ အနေနှင့် လူ့အခွင့်အရေး နှင့် တရားဥပဒေ စိုးမိုးရေးများကို အာမခံချက် ပေးရန် လိုကြောင်း၊ စီးပွားရေး ပိတ်ဆို့မှုများ ရုပ်သိမ်းပေးရုံဖြင့် တိုင်းပြည် တိုးတက်လာမည် မဟုတ်ကြောင်း အုပ်ချုပ်သူ၊ အုပ်ချုပ်ခံနှင့် စနစ် အံဝင်ခွင်ကျ ဖြစ်ရန်လိုကြောင်း အမျိုးသား ဒီမိုကရေစီ အဖွဲ့ချုပ်မှ ကိုယ်စားလှယ် နှစ်ဦးက ဆွေးနွေးသည်။
စီးပွားရေး ပိတ်ဆို့မှုများကို အမေရိကန် ပြည်ထောင်စုက ဖြေလျှော့ ပေးလိုက်ပြီ ဆိုသော်လည်း အမေရိကန် နိုင်ငံသား စီးပွားရေး လုပ်ငန်းရှင်များအား မြန်မာပြည်သို့ လာရောက် ခွင့်ပြုခြင်းသာဖြစ်ပြီး အမေရိကန် ဆီးနိတ် လွှတ်တော် အမတ် မက်ကော်နယ်နှင့် အဖွဲ့ဝင် အချို့က စီးပွားရေး ပိတ်ဆို့မှု သက်တမ်း တိုးမြှင့်ပေးရန် တင်ပြထားခြင်း ဖြစ်သည်ဟု သတင်း အခိုင်အမာ ရရှိထားကြောင်း ပြည်သူ့ လွှတ်တော် ဥက္ကဌ သူရ ဦးရွှေမန်းက လွှတ်တော် အစည်းအဝေးတွင် ပြောကြားခဲ့သည်။
မြန်မာနိုင်ငံ၏ နိုင်ငံရေးပြုပြင်ပြောင်းလဲမှုများ ဖြစ်ပေါ်လာစေရန် တွန်းအားပေးသည့် အနေနှင့် ချမှတ်ထားသည် စီးပွားရေး အရေးယူ ပိတ်ဆို့ မှုများကို သက်တမ်း ထပ်မတိုးရန် မြန်မာနိုင်ငံသို့ရောက်ရှိ နေသော အမေရိကန် ပြည်ထောင်စု၏ စီးပွားရေး ကုန်သွယ်ရေးနှင့် စိုက်ပျိုးရေးဆိုင်ရာ ဒုတိယ၀န်ကြီးဦး ဆောင်သော ကိုယ်စားလှယ် အဖွဲ့ကို တိုက်တွန်းခဲ့သည်ဟု ပြည်သူ့လွှတ်တော် ဥက္ကဌ သူရဦးရွှေမန်းက လွှတ်တော် ကိုယ်စားလှယ်များအား အသိပေးခဲ့သည်။
The voice weekly
0 comments:
Post a Comment
လာရောက်လည်ပတ်ကြသော မိတ်ဆွေတို့ရဲ့အမြင်များလည်း ရေးနိုင်ပါတယ်