စေတနာ့ဝန်ထမ်းသင်ပေးနေတဲ့ လစာမရရှိတဲ့ ကျောင်းဆရာမတဦးကို တွေ့ခဲ့ရတယ်။ ကလေးတွေအတွက် ကျောင်းစာသင်ခုံများ လုံလောက်မှု လုံးဝမရှိဘူး။ ဆရာ၊ ဆရာမအတွက် ထိုင်စရာခုံဆိုတာ ဝေလာဝေးပါပဲ။ သူငယ်တန်းကလေးတွေ အတွက် ကျောင်းစာသင်ခုံအဖြစ် ဘဲဥသေတ္တာအခွံက သစ်သားတွေကို စာသင်ခုံအဖြစ်ရိုက်ထားတာတွေ့ရတယ်။ တနှစ်ပတ်လုံးအတွက် အဲဒီ မူလတန်းကျောင်းလေးအတွက် အစိုးရက ချပေးတဲ့အသုံးစရိတ်ကတော့ ကျပ်ငွေ ငါးသောင်းတဲ့။ ဟန်ပြအဖြစ်နဲ့တော့ နွားနို့တခါတိုက်တာ သိခဲ့ရတယ်။ ဒါ့ကြောင့် နေပြည်တော်ထဲမှာရှိတဲ့ကျောင်းတွေကို လွှတ်တော်ကိုယ်စားလှယ်တွေ ဝင်ရောက်စစ်ဆေးခွင့်မပြုတာဖြစ်မှာပါ။
သနားစရာကောင်းတဲ့ နေပြည်တော် ဒက္ခိဏသီရိမြို့နယ်အတွင်းမှ ရွာသားများ
တောထဲမှာရှိတဲ့ နှမ်းခင်းပိုင်ရှင်တစ်ဦးက လက်ရှိကျောင်းတက်နေတဲ့ ကလေးလေးတွေကို သနားပြီး သူ့ယာခင်းထဲမှာ အဲဒီအိမ်ယာမဲ့ တွေကို တဲထိုးပြီးနေခိုင်းခဲ့တယ်။ အဲဒါကို အုပ်ချုပ် ရေးမှူးက ဧည့်စာရင်းဥပဒေနဲ့ အဲဒီလူတွေကို ဖမ်းဆီးမယ်လို့ ခြိမ်းခြောက်နေတယ်။ အဲဒီကိစ္စကိုဖြေရှင်းဖို့ ကျမနဲ့ကိုမင်းသူ (ဥတ္တရသီရိ) တို့နှစ်ယောက်ဟာ ဒက္ခဏသီရိ အုပ်ချုပ်ရေးမှူးနှင့် သွားရောက်တွေ့ဆုံကာ ညှိနှိုင်းဖြေရှင်းဖို့ ကြိုးစားသော်လည်း မြို့နယ်အထွေထွေအုပ်ချုပ်ရေးမှူးမှ အတွေ့မခံဘဲ အမြဲလိုလိုရှောင်ရှားနေပါတယ်။ ပြဿနာများကို လည်းဖြေရှင်းပေးခြင်းလည်းမရှိဘူး။ ကျမတို့ကိုယ်စားလှယ်တွေဟာ မိမိတို့မဲဆန္ဒနယ်မြေဒေသဖွံ့ဖြိုး ရေးလုပ်ငန်းများမှာ အုပ်ချုပ်ရေး အာဏာပိုင်များနှင့် ပူးပေါင်းဆောင်ရွက်နိုင်ဖို့ အတွက်နေပြည် တော်အုပ်ချုပ်ရေးမှူးများနှင့် တွေ့ဆုံရန်ကြိုးစားပါသော်လည်း အစဉ်အမြဲအကြောင်းအမျိုးမျိုးပြ ကာ ရှောင်ရှားနေ တတ်ကြတယ်။ သူတို့က ကျူးကျော်ဆိုပြီး လူတွေရဲ့အိမ်တွေကိုဖျက်မယ်။
လူတွေကိုဒီဒေသကနေ နှင်ထုတ်မယ်။ နေပြည်တော်ဆိုတဲ့ မြို့ကြီးမှာ ဆင်းရဲသားအလုပ်လက်မဲ့များကို ရှိစေချင်ပုံမရပါဘူး။ နှင်ထုတ်ခံရတဲ့ မိသားစုထဲက ကလေးတွေ က တော့ ကျောင်းဆက်တက်ဖို့ မလွယ်ကူတော့ဘူး။
ဒေါ်စန္ဒာမင်း (အမျိုးသားဒီမိုကရေစီအဖွဲ့ချုပ် ဇဗ္ဗူသီရိမြို့နယ် လွှတ်တော်ကိုယ်စားလှယ်)
0 comments:
Post a Comment
လာရောက်လည်ပတ်ကြသော မိတ်ဆွေတို့ရဲ့အမြင်များလည်း ရေးနိုင်ပါတယ်